ধুবুৰী, ৩ ফেব্ৰুৱাৰী: ধুবুৰী জিলা অংগনাবাড়ী কৰ্মী সহায়িকা সন্থাৰ চতুৰ্থ ত্ৰিবার্ষিক অধিৱেশন অহা ৮ আৰু ৯ ফেব্ৰুৱাৰীত গৌৰীপুৰৰ মাটিয়াবাগত অনুষ্ঠিত হ'ব । সদৌ ধুবুৰী জিলা অংগনাবাদী কৰ্মী সহায়িকা সন্থাৰ সভানেত্ৰী পাৰভিন সাহাজাদাই বুধবাৰে এক সংবাদ মেলযোগে এই কথা জানিবলৈ দিয়ে ।
এই অধিৱেশনৰ জৰিয়তে সদৌ ধুবুৰী জিলা অংগনাবাড়ী কৰ্মী সহায়িকাসকলৰ চাকৰি নিয়মীয়াকৰণ আৰু দৰমহা বৃদ্ধিকে ধৰি দীর্ঘদিনীয়া বিভিন্ন দাবীৰ অসম চৰকাৰক দৃষ্টি গোচৰ কৰিবলৈ এই অধিৱেশনৰ আয়োজন কৰা হৈছে । উল্লেখ্য যে, এই অধিৱেশনত কৰ্মী সহায়িকাসকলৰ বিভিন্ন সমস্যা সমাধানৰ বিষয়ে প্ৰস্তাৱ গৃহীত হ'ব । লগতে আগন্তুক বিধানসভা অধিৱেশনত বিভাগীয় মন্ত্ৰীয়ে উপস্থাপন কৰাৰ দাবী উত্থাপন কৰে সভানেত্ৰী গৰাকীয়ে ।
উক্ত কাৰ্য্যসূচী মতে ৮ ফেব্ৰুৱাৰীত সাংস্কৃতিক শোভাযাত্ৰা উলিওৱাৰ লগতে দ্বিতীয় দিনা ৯ ফেব্ৰুৱাৰীত অনুষ্ঠিত মুকলি সভাত মুখ্য অতিথি হিচাপে উপস্থিত থাকিব অসমৰ সমাজ কল্যাণ বিভাগৰ মন্ত্রী প্ৰমিলা ৰাণী ব্রহ্ম আৰু ধুবুৰী জিলাৰ সমষ্টি বিধায়কসকল তথা প্ৰাক্তন মন্ত্রীৰ লগতে বহুকেইগৰাকী বিশিষ্ট অতিথি ।
উল্লেখ্য যে, অংগনাবাড়ী কৰ্মী সহায়িকাসকলৰ দীর্ঘদিনীয়া দাবীৰ পিছতো ৰাজ্য চৰকাৰে আজিলৈকে কোনো গুৰুত্ব প্ৰদান কৰা নাই যদিওঁ এই অধিৱেশনৰ পিছত বিভাগীয় মন্ত্ৰীয়ে কেনে পদক্ষেপ গ্ৰহণ কৰিব সেয়া লক্ষণীয় বিষয় হ'ব ।
লগতে পঢ়ক:বটদ্ৰৱা সমষ্টিৰ পৰা আঞ্চলিক গণ মৰ্চাৰ হৈ কোনে কৰিব প্ৰতিদ্বন্দিতা ?
