ধুবুৰীত ব্ৰহ্মপুত্ৰৰ বুকুত নাও দুৰ্ঘটনাত এজনৰ মৃত্যু

প্ৰচণ্ড ধুমুহাৰ ফলত ধুবুৰীৰ নিউঘাট অঞ্চলত ব্ৰহ্মপুত্ৰৰ বুকুত সংঘটিত হয় এক শোকাৱহ নাও দুৰ্ঘটনা ৷ দুৰ্ঘটনাত নিহত এজন ৷

ধুবুৰী,15 এপ্ৰিল: বুধবাৰে ৰাজ্যৰ ভিন্ন প্ৰান্তত বিধ্বংসী ধুমুহাই তাণ্ডৱ চলোৱাৰ সময়তে ধুবুৰীত অঘটন ৷ হৰ্ঠাৎ অহা প্ৰচণ্ড ধুমুহাৰ ফলত ধুবুৰীৰ নিউঘাট অঞ্চলত ব্ৰহ্মপুত্ৰৰ বুকুত সংঘটিত হয় এক শোকাৱহ নাও দুৰ্ঘটনা ৷ দুৰ্ঘটনাটোত প্ৰাণ হেৰুৱাই শ্বেৰ আলী নামৰ এজন 56 বছৰীয়া বৃদ্ধই ৷ উল্লেখ্য যে ধুমুহা অহাৰ সময়ত ব্ৰহ্মপুত্ৰৰ বুকুত এখন টুলুঙা নাও লৈ মাছ মাৰি আছিল মৃত শ্বেৰ আলী নামৰ বৃদ্ধ গৰাকীয়ে ৷

আনহাতে দুৰ্ঘটনাটোত কথমপি প্ৰাণ ৰক্ষা পৰে নাওখনত থকা মৃত ব্যক্তিজনৰ মহৰ আলী নামৰ 23 বছৰীয়া পুত্ৰৰ ৷ জানিব পৰা মতে মৃত বৃদ্ধ গৰাকীৰ ঘৰ ধুবুৰীৰ অয়ৰাণ জংলা তৃতীয় খণ্ড গাঁৱত ৷ ঘটনাৰ পিছতেই ধুবুৰী আৰক্ষী ঘটনাস্থলীত উপস্থিত হৈ বৃদ্ধ গৰাকীৰ মৃতদেহ উদ্ধাৰ কৰি মৰণোত্তৰ পৰীক্ষাৰ ব্যৱস্থা কৰে ৷ এই ঘটনাই এতিয়া শোকৰ ছাঁ পেলাইছে অঞ্চলটোত ৷

লগতে পঢ়কঃ লখিমপুৰত দিল্লীৰ তবলিগী জামাতত অংশগ্ৰহণকাৰী এজনৰ মৃত্যু