ধুবুৰী, 8 আগষ্টঃ দীৰ্ঘ দিনৰে পৰা ধুবুৰীৰ একাংশ প্ৰতিষ্ঠিত ব্যৱসায়ীয়ে ৰাজহুৱা বিতৰণ ব্যৱস্থাৰ সুলভ মূল্যৰ চাউলক লৈ ক'লা বজাৰৰ বৃহৎ ছিণ্ডিকেট চলাই গৈছে । ধুবুৰীৰ একাংশ প্ৰতিষ্ঠিত ব্যৱসায়ীয়ে এই সমূহ সুলভ মূল্যৰ কুইন্টল কুইন্টল চাউল কৌশলগত ভাবে মেঘালয় আৰু মেঘালয় হৈ বাংলাদেশলৈ চালান দিয়াৰ বিপৰীতে নদী পথেৰেও বাংলাদেশলৈ চালান দি আহিছে বুলি অভিযোগ উঠিছে । কিন্তু ইয়াৰ পিছতো ৰহস্যজনক ভূমিকাত আছে ধুবুৰী খাদ্য আৰু অসামৰিক যোগান বিভাগ ।
জিলা উপায়ুক্তই লাভ কৰা গোপন তথ্যৰ ভিত্তিত যোগান বিভাগক কঠোৰ নিৰ্দেশ উপায়ুক্তৰ । যাৰ বাবে বৃহস্পতিবাৰে জিলা খাদ্য আৰু অসামৰিক যোগান বিভাগৰ উপ সঞ্চালক বিপিন চক্ৰৱৰ্তীৰ নেতৃত্বত এটা দলে ধুবুৰীৰ আব্দুৰ ৰহমান নামৰ ব্যৱসায়ীৰ এ আৰ ট্ৰেডাৰ্চ নামৰ ব্যৱসায়ী প্ৰতিষ্ঠানৰ গুদামত চলায় অভিযান । এই অভিযানত ভাৰতীয় খাদ্য নিগমৰ ৰচিদ লগোৱা বৃহৎ পৰিমাণৰ চাউলৰ বস্তা জব্দ হয় । বিভাগীয় উপ সঞ্চালক বিপিন চক্ৰৱৰ্তীয়ে জনোৱা মতে ৪১.৬০ কুইন্টল সুলভ মূল্যৰ চাউলৰ লগতে নতুন ব্ৰেণ্ডৰ বস্তাত ভৰোৱা ৯৬০ কুইন্টল সুলভ মূল্যৰ চাউল জব্দ কৰে।
