ধেমাজি,৩০ অক্টোবৰ: ধেমাজি ৰাজহ চক্ৰ কাৰ্যালয়ৰ দুৰ্নীতিগ্ৰস্ত বিষয়া গীতালি দুৱৰাক শাস্তিমূলক বদলিৰ দাবীত বুধবাৰে ধেমাজি ৰাজহ চক্ৰ কাৰ্যালয় উত্তাল কৰিলে অসম জাতীয়তাবাদী যুৱ ছাত্ৰ পৰিষদৰ ধেমাজি জিলা সমিতিয়ে ৷ প্ৰতিবাদকাৰীসকলে কাৰ্যালয়টোত তলাবন্ধ কৰাৰ উদ্দেশ্যৰে কাৰ্যালয়ৰ অভিমুখে অগ্ৰসৰ হয় যদিও প্ৰৱেশদ্বাৰত বিশাল আৰক্ষী আৰু চি আৰপি এফ বাহিনীয়ে সমদলটোক বাধা দিয়ে ৷ ফলস্বৰূপে প্ৰৱেশদ্বাৰতে নিৰাপত্তাৰক্ষীৰ সৈতে ঠেলাঠেলি লিপ্ত হয় প্ৰতিবাদকাৰী সকল ৷ ধেমাজি ৰাজহচক্ৰ বিষয়া গীতালি দুৱৰা হায় হায়, গীতালি দুৱৰাক শাস্তিমূলক বদলি কৰক, ঘোচখোৰ দালাল মণ্ডলসকল হুচিয়াৰ - আদি শ্লোগানেৰে প্ৰতিবাদস্থলী উত্তাল হৈ পৰে ৷
ইপিনে সংগঠনটোৰ জিলা সমিতিৰ সাধাৰণ সম্পাদক বিষ্ণু শৰ্মাই অভিযোগ উত্থাপন কৰি কয় যে, দীৰ্ঘদিন ধৰি ধেমাজি ৰাজহ চক্ৰ কাৰ্যালয়ত মাটি ম্যাদীকৰণকে ধৰি বিভিন্ন কাম-কাজ কৰাৰ বাবে কাৰ্যালয়টোৰ ৰাজহ চক্ৰ বিষয়া গৰাকী আৰু মণ্ডলসকলে অবাধে উৎকোচ লৈ ব্যাপক অৰাজকতা সৃষ্টি কৰি আহিছে ৷ সেয়ে দুৰ্নীতিগ্ৰস্ত বিষয়াগৰাকী আৰু মণ্ডলসকলৰ বিৰুদ্ধে শীঘ্ৰে শাস্তিমূলক ব্যৱস্থা গ্ৰহণ কৰিবলৈ দাবী জনাই প্ৰতিবাদকাৰীসকলে মুখ্যমন্ত্ৰীলৈ স্মাৰকপত্ৰ প্ৰেৰণ কৰে ৷
