ধেমাজি,28 মে': সমগ্ৰ দেশৰ লগতে ৰাজ্যত ক'ভিডে ধাৰণ কৰিছে ভয়াৱহ ৰূপ ৷ ক'ভিডত আক্ৰান্ত হৈ ইতিমধ্যে হাজাৰ হাজাৰ লোকৰ মৃত্যু হোৱাৰ লগতে বৰ্তমানেও চিকিৎসাধীন হৈ আছে বহু ৰোগী ৷ সমান্তৰালকৈ বহু চিকিৎসালয়ত অক্সিজেন চিলিণ্ডাৰ,পি পি ই কিটৰ অভাৱ হোৱাৰ বাবে অকাল মৃত্যুক সাৱটিব লগীয়া হৈছে বহু ক'ভিড আক্ৰান্তই ৷ ক'ভিডৰ এই ভয়াৱহ পৰিস্থিতিৰ মাজতে ধেমাজিত আৰ্তজনক সহায়ৰ বাবে আগবাঢ়ি আহিছে ভাৰতৰ অগ্ৰণী স্বেচ্ছাসেৱী অনুষ্ঠান গুঞ্জ ৷
গুঞ্জ নামৰ স্বেচ্ছাসেৱী অনুষ্ঠানটোৱে শুকুৰবাৰে ধেমাজিৰ অন্যতম স্বেচ্ছাসেৱী অনুষ্ঠান আৰ ভি চি আৰু চেড'ৰ সহযোগত ধেমাজি অসামৰিক চিকিৎসালয়ৰ ক'ভিড ৰোগীসকলৰ বাবে 30 টা অক্সিজেন চিলিণ্ডাৰ আগবঢ়ায় ৷ ধেমাজি জিলাৰ উপায়ুক্ত পি বিজয় ভাস্কৰ ৰেড্ডীৰ উপস্থিতিত ধেমাজি অসামৰিক চিকিৎসালয়ৰ অধীক্ষকৰ হাতত চিলিণ্ডাৰ কেইটা অৰ্পণ কৰে সংস্থাটোৱে ৷
প্ৰায় 30 লাখ টকাৰ মূল্যৰ এই জীৱনদায়িনী অক্সিজেনৰ প্ৰদানৰ বাবে গুঞ্জক ভূয়সী প্ৰশংসা কৰে জিলাৰ উপায়ুক্তই ৷ ইপিনে অনুষ্ঠান তিনিটাই ধেমাজি অসামৰিক চিকিৎসালয়ৰ ক'ভিড যোদ্ধা, চিকিৎসক, নাৰ্চ আৰু স্বাস্থ্য কৰ্মীসকলৰ বাবে 120 টা পি পি ই কিট আৰু ফেচচিল্ড প্ৰদান কৰে ৷ এই ভয়াৱহ পৰিৱেশৰ মাজতে মানৱ কল্যাণৰ বাবে আগবাঢ়ি অহা তিনিওটা স্বেচ্ছাসেৱী অনুষ্ঠানৰ পদক্ষেপক প্ৰশংসা কৰিছে ধেমাজিবাসীয়ে ৷
লগতে পঢ়কঃ ধনদাবী কৰি কাৰ্বি আংলঙত দুই দুৰ্বৃত্ত আটক
