জোনাই,24 মে': জোনাই মহকুমাত বোৱাৰী নিৰ্যাতনৰ দৰে এক ঘটনা পোহৰলৈ আহিছে ৷ অভিযোগ অনুসৰি, দাবী কৰা যৌতুক নিদিয়াৰ বাবেই নিৰ্যাতিত বোৱাৰী গৰাকীৰ স্বামী আৰু স্বামীৰ পৰিয়ালৰ সদস্যই সংঘবদ্ধভাৱে দীৰ্ঘদিন ধৰি নিৰ্যাতন চলাই আহিছিল ৷
উপায়ন্তৰ হৈ জোনাই মহকুমাৰ লক্ষী নেপালী বস্তিৰ নিৰ্যাতিত বোৱাৰীগৰাকীক মাকৰ ঘৰৰ পৰিয়ালৰ লোকে উদ্ধাৰ কৰি সোমবাৰে জোনাই সদৰ আৰক্ষীৰ কাষ চাপে আৰু এই সন্দৰ্ভত দাখিল কৰে এক এজাহাৰ ৷
এজাহাৰত উল্লেখ কৰা অনুসৰি, প্ৰায় ৯ বছৰ পূৰ্বে ভুক্তভোগী মহিলাগৰাকীৰ সৈতে লক্ষী নেপালী বস্তিৰ ফনিন্দ্ৰ দলেয়ে সামাজিক ৰীতি-নীতিৰে বিবাহ পাক্ষত আবদ্ধ হয় । কিন্তু বিয়া হোৱা দিনাৰ পৰাই বোৱাৰী গৰাকীৰ সংসাৰত আৰম্ভ হয় অশান্তি ।
বিবাহৰ পাচত ভুক্তভোগী মহিলাগৰাকীৰ শাহুৱেকে স্বামীৰ সৈতে পৃথকে পৃথকে থাকিব দিয়াৰ উপৰিও কোনো সন্তান প্ৰয়োজন নাই বুলি গৰ্ভ নষ্ট কৰা টেবলেট খাব দিছিল ৷ আনহাতে, বাৰম্বাৰ নিৰ্যাতিত মহিলাগৰাকীক পিতৃ গৃহৰ পৰা 12 বিঘা মাটি বিচাৰি শাৰীৰিক আৰু মানসিক অশান্তি কৰি আহিছিল । মহিলাগৰাকীয়ে যিমান পাৰে স্বামী আৰু পৰিয়ালক সন্তুষ্ট কৰি ৰাখিছিল । কিন্তু মহিলাগৰাকী পিতৃ গৃহৰ পৰিয়ালে বাৰম্বাৰ যৌতুক দিবলৈ অসমৰ্থ হোৱাত নানা ধৰণৰ শাৰীৰিক-মানসিক অত্যাচাৰৰ লগতে ধাৰাবাহিক বাবে মাৰপিট কৰি আহিছিল বুলি অভিযোগ উত্থাপন কৰিছে ৷
পৰিণতিত মহিলাগৰাকী ওপৰত চলা মানসিক আৰু শাৰীৰিক নিৰ্যাতন ক্ৰমশঃ বাঢ়িবলৈ ধৰে । শহুৰেকৰ গৃহৰ পৰা দাবী কৰা 12 বিঘা মাটি আদায় নোপোৱা বাবেই মহিলাগৰাকীৰ স্বামী আৰু স্বামীৰ পৰিয়ালে চলাবলৈ লয় অকথ্য নিৰ্যাতন ৷ অৱশেষত নিৰ্যাতন সহিব নোৱাৰি সোমবাৰে চানিয়াৰ পৰিয়ালৰ লোকে মহিলাগৰাকীক নিজ মাতৃ গৃহলৈ লৈ যায় ।
মহিলাগৰাকীয়ে অভিযোগ কৰা অনুসৰি, বহুবাৰ কেৰাচিন তেল ঢালি চানিয়াক জ্বলাই দিবলৈও চেষ্টা কৰিছিল স্বামীৰ পৰিয়ালে । মহিলাগৰাকীয়ে নিজৰ ওপৰত চলা নিৰ্যাতনৰ সম্পৰ্কে মাজে-সময়ে ওচৰ চুবুৰীয়াৰ আগতো অবগত কৰিছিল ।
উল্লেখ্য যে, ভুক্তভোগী মহিলাগৰাকীৰ পিতৃ-মাতৃয়ে জোনাই সদৰ আৰক্ষী থানাত এজাহাৰ দিয়াৰ পাচতেই ঘটনাস্থলীত উপস্থিত হয় আৰক্ষী ৷ আৰক্ষীয়ে এই সন্দৰ্ভত আৰম্ভ কৰে তদন্ত ৷
আনহাতে, মহিলাগৰাকীৰ শহুৰেকে এই সন্দৰ্ভত সাংবাদিকৰ আগত মন্তব্য কৰে যে, ‘‘বিয়া হৈ অহা পৰাই পুত্ৰ আৰু বোৱাৰীৰ মাজত প্ৰায়ে কাজিয়া সূত্ৰপাত হয় ৷ তাত মই বা মোৰ পত্নী জড়িত নহয় ৷ কাৰণ পিতৃ-মাতৃ হিচাপে দুয়োৰে ভৰণ পোষণৰ দায়িত্ব লৈ আছো ৷ পুত্ৰ-বোৱাৰীৰ মাজত প্ৰায়েই কাজিয়া হয় থাকে বাবে মাজে সময়ে দুয়োকে ঘৰৰপৰা ওলাই বেলেগ সংসাৰ কৰিবলৈও কওঁ ৷ কিন্তু মই বা মোৰ পত্নীয়ে নিৰ্যাতন চলোৱা নাই’’ ৷
যৌতুক প্ৰথা আৰু নাৰী নিৰ্যাতনৰ বিৰুদ্ধে যিমানে চৰকাৰে আইন প্ৰণয়ন কৰিছে, সিমানে যেন বাঢ়িবলৈ ধৰিছে এই অসামাজিক অপৰাধৰ ঘটনা । এনে বহু অপৰাধমূলক ঘটনা পোহৰলৈ নাহে । এই ক্ষেত্ৰত জোনাইত সংঘটিত এই ঘটনাৰ লগত জড়িত অপৰাধীৰ তদন্ত কৰি দৃষ্টামূলক শাস্তিৰ দাবী কৰিছে সচেতন ৰাইজে ।
