ওৰাং, 14 জুলাইঃ প্ৰলয়ংকাৰী বানত বিধ্বস্ত ৰাজ্যৰ ওৰাং ৰাষ্ট্ৰীয় উদ্যান ৷ বানে প্লাৱিত কৰিছে উদ্যানখনৰ বিস্তৃত অঞ্চল ৷ বছৰৰ দ্বিতীয়টো বানৰ কবলত পৰিছে ৰাষ্ট্ৰীয় উদ্যানখনৰ প্ৰায় ৭৫ শতাংশ বনাঞ্চল । ব্ৰহ্মপুত্ৰৰ নৈ-উপনৈসমূহৰ জলপৃষ্ঠ ওফন্দি উঠাৰ ফলত উদ্যানখনৰ বিস্তৃত এলেকা পানীত ডুব গৈছে ৷ ফলশ্ৰুতিত উদ্যানখনৰ বন্য জীৱ-জন্তুৰ জীৱনলৈ ভাবুকি আহি পৰিছে ।
লগতে পঢ়কঃ মুকলি আকাশৰ তলত মানস কোঁৱৰ
তথ্য অনুসৰি,উদ্যানখনৰ ২৪ টাকৈ বন শিবিৰ ব্ৰহ্মপুত্ৰ আৰু ধনশিৰি নৈৰ বাঢ়নী পানীয়ে বুৰাই পেলোৱাৰ ফলত বন কৰ্মীসকলে খোজকাঢ়ি আৰু টুলুঙা নাও আদিৰে বন্য-জীৱ জন্তুক সুৰক্ষা দিয়াৰ কামত নিয়োজিত হৈ আছে । পানীত বুৰ যোৱা বন শিবিৰসমূহত জিলা বন বিভাগৰ পৰা খাদ্য সামগ্ৰী যোগান ধৰাৰ ব্যৱস্থা গ্ৰহণ কৰা হৈছে ।
উল্লেখ্য যে,ওৰাং ৰাষ্ট্ৰীয় উদ্যানত বানৰ কোবাল সোঁতে দুটাকৈ পহু উটুৱাই লৈ যায় যদিও বান পীড়িত ৰাইজে পহু দুটা উদ্ধাৰ কৰি পুনৰ ৰাষ্ট্ৰীয় উদ্যানৰ বন কৰ্মীক চমজাই দিয়ে। ইফালে উদ্যানৰখনৰ জীৱ জন্তুসমূহে দিক-বিদিক হেৰুৱাই ওখ ঠাইলৈ ঢাপলি মেলা পৰিলক্ষিত হৈছে ।
