মঙলদৈ, 6 ছেপ্তেম্বৰঃ মঙলদৈত ড্ৰাগছ সহ আটক এগৰাকী শিক্ষয়িত্ৰী । লগতে আটক শিক্ষয়িত্ৰী গৰাকীৰ স্বামী জীবেশ ডেকা । শিক্ষয়িত্ৰী গৰাকী বান্দীয়া এল পি ৰ কনমাই দেৱী ডেকা । ড্ৰাগছ ব্যৱসায়ৰ সৈতে জড়িত থকাৰ অভিযোগত আটক দুয়োকে । পূৰ্বেও এবাৰ একেটা অপৰাধতে আটক হৈছিল দুয়োগৰাকী । পিছত পুনৰ ড্ৰাগছৰ ব্যৱসায় কৰি যোৱাৰ খবৰ লাভ কৰি মঙলদৈ আৰক্ষীয়ে আটক কৰিলে দুয়োকে । আৰক্ষীয়ে শিক্ষয়িত্ৰী গৰাকীৰ বাঘপৰিৰ নিজা গৃহৰ পৰা জব্দ কৰে চাৰিটা খালি ড্ৰাগছৰ টেমা । অৱশ্যে শিক্ষয়িত্ৰী গৰাকীৰ স্বামীয়ে বিক্ৰীৰ বাবে নহয় খোৱাৰ বাবেহে ড্ৰাগছ অনা বুলি প্ৰকাশ কৰে ।
আনহাতে, দৰঙৰ খাৰুপেটীয়াত ড্ৰাগছ অতি সহজে পোৱা যায় বুলিও প্ৰকাশ কৰে স্বামী জীবেশ ডেকাই । মঙলদৈ থানাৰ 728/2019 U/S 22A নম্বৰত আৰক্ষীয়ে গোচৰ ৰুজু কৰি আটক কৰে । ইতিমধ্যে শিক্ষয়িত্ৰী কনমাই দেৱী ডেকাক জেল হাজোতলৈ প্ৰেৰণ কৰাৰ বিপৰীতে স্বামী জীবেশ ডেকাক এদিনৰ বাবে আৰক্ষীৰ জিম্মাত ৰাখে বুলি জানিবলৈ দিয়ে আৰক্ষীয়ে ।
