চিৰাং,7 ছেপ্তেম্বৰ: বাট-পথৰ দুৰৱস্থাৰ বাবে যথেষ্ঠ দুৰ্ভোগ ভূগিবলগীয়া হৈছে চিৰাঙবাসীয়ে ৷ জিলাখনৰ গৰুভাষা অঞ্চলৰ চানপুৰত থকা এখন ভগ্ন দলঙে অঞ্চলটোৰ যাতায়াতৰ ক্ষেত্ৰত সম্প্ৰতি অন্তৰায় হিচাপে দেখা দিছে ৷ ঘটনাৰ বিৱৰণী অনুসৰি, চিৰাং জিলাৰ চিদলী উন্নয়ন খণ্ডৰ অন্তৰ্গত চানপুৰৰ মাজেৰে বৈ যোৱা মৰা ভূৰনৈৰ ওপৰত থকা দলঙখন দীৰ্ঘদিনে জৰাজীৰ্ণ অৱস্থাত আছে ৷ প্ৰায় 6খন গাঁওৰ যাতায়াতৰ একমাত্ৰ সাৰথি উক্ত দলঙখনৰ ওপৰেৰে দৈনিক আহ-যাহ কৰে অসংখ্য পথচাৰী ৷
বিগত প্ৰায় 17 বছৰে বিটিচিৰ শাসনৰ বাঘজৰী চম্ভালি থকা হাগ্ৰামা মহিলাৰী নেতৃত্বাধীন চৰকাৰখনে এই দলং মেৰামতিৰ বাবে গ্ৰহণ নকৰিলে কোনোধৰণৰ ব্যৱস্থা ৷ যাৰ ফলত বৃহৎ অঞ্চলটোৰ ৰাইজে ভূগিবলগীয়া হৈছে যমৰ যাতনা ৷ প্ৰতিটো নিৰ্বাচনৰ পূৰ্বে সমষ্টিবাসীলৈ মনত পৰা জন প্ৰতিনিধিসকলে ৰাইজক আশ্বাস দিয়ে দলঙখন মেৰামতি কৰাৰ ৷ কিন্তু নিৰ্বাচন পাৰ হোৱাৰ পিছত সেয়া ফুটুকাৰ ফেনত পৰিণত হয় ৷
উল্লেখ্য যে,দলঙখনৰ দুৰৱস্থাৰ বাবে গাঁওসমূহলৈ আহিব নোৱাৰে জৰুৰীকালীন সেৱাত জড়িত এম্বুলেঞ্চ সেৱা ৷ সেয়ে চিকিৎসাৰ বাবে দুৰণিলৈ ৰোগীক কঢ়িয়াবলগীয়া হয় সাঙীৰ সহায়ত ৷ এই সমষ্টিৰ পৰাই মন্ত্ৰী চন্দন ব্ৰহ্ম একেৰাহে তিনিবাৰকৈ নিৰ্বাচনত জয়ী হৈ মন্ত্ৰীত্বৰ বাব চম্ভালি আছে যদিও মন্ত্ৰীগৰাকীৰ সমষ্টিবাসীৰ সমস্যা সমাধানৰ বাবে নাই আহৰি ৷ সেয়ে এইবাৰ জন প্ৰতিনিধিৰ পৰা প্ৰতিশ্ৰুতি,আশ্বাস বিচৰাৰ পৰিৱৰ্তে ৰাইজে বিচাৰিছে উন্নয়নমূলক কাম ৷
লগতে চাওকঃ ৮০-১০০ খন আসনত প্ৰতিদ্বন্দিতা কৰিব আছুৰ ৰাজনৈতিক দলে
