শিলচৰ, 1 ফেব্ৰুৱাৰী : বড়োলেণ্ডত হোৱা সাম্প্ৰদায়িক সংঘৰ্ষক লৈ মন্তব্য কৰে অসম বিধানসভাৰ উপাধ্যক্ষ আমিনুল হক লস্কৰে ৷ তেওঁ কয় যে, কংগ্ৰেছ দলৰ আমোলত বড়োলেণ্ডত সংঘটিত হোৱা সংঘৰ্ষত 70 টা মছজিদ আৰু মাদ্ৰাছা ভাঙি চূৰমাৰ কৰা হৈছিল ৷ সংখ্যালঘু ৰাইজক হত্যা কৰা হৈছিল । ঘৰ-বাৰী সা-সম্পত্তি জ্বলাই দিয়া হৈছিল ৷
লগতে তেওঁ কয় যে, কংগ্ৰেছৰ দিনত মছজিদ-মাদ্ৰাছা ভঙাৰ ক্ষতিপূৰণ কংগ্ৰেছে লোৱা উচিত । বিজেপি চৰকাৰৰ বিৰুদ্ধে সাম্প্ৰদায়িক মন্তব্য নকৰি বড়োলেণ্ডত মছজিদ-মাদ্ৰাছা কিয় ভঙা হৈছিল বুলি বদৰুদ্দিন আজমলে কংগ্ৰেছক প্ৰশ্ন কৰা উচিত । বিজেপিৰ শাসনত এবাৰো সাম্প্ৰদায়িক সংঘৰ্ষ হোৱা নাই । কংগ্ৰেছৰ আমোলতহে সাম্প্ৰদায়িক সংঘৰ্ষ হৈছিল ৷
ইফালে, উপাধ্যক্ষ আমিনুল হক লস্কৰৰ এই মন্তব্যক উভতি ধৰিলে সোনাই সমষ্টিৰ প্ৰাক্তন বিধায়ক এনামুল হকে । তেওঁ কয় যে, উপাধ্যক্ষ পদত থাকি এনে ধৰণৰ সাম্প্ৰদায়িক মন্তব্য কৰা উচিত নহয় । এয়া সংবিধান বিৰোধী ।
কংগ্ৰেছ চৰকাৰৰ সময়ত বড়োলেণ্ডত কিমান মছজিদ আৰু মুছলমান সম্প্ৰদায়ৰ মানুহক হত্যা কৰা হৈছে, তাৰ তথ্য প্ৰমাণ দাঙি ধৰাৰ বাবে উপাধ্যক্ষ আমিনুলক আহ্বান জনায় এনামুল হকে । বৰ্তমান সময়ত আমিনুল হকে যি মন্তব্য কৰি আছে সেয়া আৰএছএছৰ ভাষ্য বুলি সদৰি কৰে প্ৰাক্তন বিধায়ক এনামুল হকে ৷
লগতে পঢ়ক : নাওবৈচাত মুখ্যমন্ত্ৰীৰ প্ৰতিকৃতি দাহ কৰি প্ৰতিবাদ আছুৰ
