বঙাইগাঁও, 28 জুনঃ বঙাইগাঁৱৰ চাপৰাকাটাস্থিত এচ এচ বিৰ ক্ষেত্ৰীয় (চেক্টৰ)ৰ কাৰ্য্যালয়ত শুকুৰবাৰে এক ৰক্তদান শিবিৰৰ আয়োজন কৰা হয় ৷ বঙাইগাঁও অসামৰিক চিকিৎসালয়ৰ সহযোগত আয়োজন কৰা এই ৰক্তদান শিবিৰত শতাধিক এচ এচ বিৰ জোৱানে ৰক্তদান কৰে ।
এচ এচ বিৰ গোসাইগাঁৱত থকা ৩১ নং বেটেলিয়ন, চিৰাঙৰ কাজলগাঁওত থকা ১৫ নং বেটেলিয়ন আৰু ৰানীঘুলিত থকা ৬ নং বেটেলিয়নৰ জোৱান সকলে এই ৰক্তদান শিবিৰত অংশগ্ৰহন কৰা পৰিলক্ষিত হয় । বঙাইগাঁও ক্ষেত্ৰীয় এচ এচ বিৰ ডিআইজি এন্টনি থানমি,অতিৰিক্ত কমাণ্ডেন্ট তিনিজন ক্ৰমে পি কে মেধি,অনিল যোশী আৰু ঘনশ্যাম মিনা আৰু বঙাইগাঁও অসামৰিক চিকিৎসালয়ৰ অধ্যক্ষ ডঃ পি কে ৰায়, ডঃ অনিৰ্বান গোস্বামী আৰু ডঃ পুষ্পেন্দ্ৰ দাসসহ কেইবাজনো বিষয়া কৰ্মচাৰী এই ৰক্তদান শিবিৰত উপস্থিত থাকি এচ এচ বিৰ জোৱান সকলক উদ্দেশ্যি ৰক্তদান আৰু ইয়াৰ উপকাৰিতাৰ সম্পৰ্কে ব্যাখ্যা আগবঢ়ায় ।
