বঙাইগাঁও, 15 জুন : মহামাৰী কৰ'ণাই বিপদ নমাই আনিছে ৰাজ্যৰ অৰ্থনৈতিক অৱস্থাৰ প্ৰতি ৷ কৰ'ণাক প্ৰতিৰোধৰ বাবে ৰাজ্য চৰকাৰে জাৰি কৰা নতুন নিৰ্দেশনাই শেহতীয়াকৈ ক্ষতিগ্ৰস্ত কৰিছে আন আন ক্ষেত্ৰসমূহৰ লগতে কৃষিখণ্ড তথা ক্ষুদ্ৰ ব্যৱসায়ীসকলক ৷ বজাৰৰ অভাৱত উৎপাদিত শস্য, দুগ্ধজাত সামগ্ৰী আদি বিক্ৰী কৰিব নোৱাৰি ব্যৱসায়ীসকল হতাশাৰ সন্মুখীন হোৱাৰ দৰেই বাঁহ-বেতৰ সামগ্ৰী নিৰ্মাণ কৰি পৰিয়াল পোহপাল দিয়া লোক সকলো এতিয়া চিন্তিত হৈ পৰিছে ৷ কিয়নো আন্তঃজিলা যাতায়ত তথা হাট-বজাৰ বন্ধ হোৱাৰ বাবেই বজাৰৰ অভাৱত সামগ্ৰী সমূহ বিক্ৰী কৰিব পৰা নাই ৷ যাৰ ফলত তেওঁলোকৰ অৱস্থা পানীত হাঁহ নচৰা হৈছে ৷
আন আন ঠাইৰ দৰে কৰ'ণাৰ সংহাৰে এক প্ৰকাৰ কোঙা কৰি তুলিছে বঙাইগাঁও জিলাৰ মানিকপুৰৰ বাঢ়ৈ সকলকো ৷ মানিকপুৰৰ ২নং বালাৰচৰ গাঁৱৰ এই সকল লোকে জীৱন জীৱিকাৰ একমাত্ৰ পথ হিচাপে বাছি লৈছিল বাঁহ-বেতৰ সামগ্ৰী নিৰ্মাণৰ কাম ৷ কিন্তু কৰ'ণাৰ ভয়াৱহ সংক্ৰমণৰ বাবে এতিয়া স্তব্ধ হৈ পৰিছে উপাৰ্জনৰ পথ ৷ ডলা,চালনী, কুলা,বিচনী আদি তৈয়াৰ কৰি বজাৰত বিক্ৰী কৰি কোনো মতে পৰিয়াল পোহপাল দিয়া এই বাঢ়ৈসকলৰ জীৱনলৈ হঠাৎ নামি আহিছে অমানিশা ৷
বাঁহৰ সামগ্ৰী নিৰ্মাণেৰে পেটৰ ভাত মুঠি যোগাৰ কৰি অহা গাঁওখনৰ প্ৰায় 150 টা পৰিয়ালে বহু দিন ধৰি বজাৰ হাট নথকাৰ ফলত এতিয়া চিন্তিত হৈ পৰিছে সকলোৱে ৷ চৰকাৰ মুখলৈ বাট চাই চাই ক্ষোভিত হৈ পৰিছে গাঁওখনৰ এই সকল লোক ৷ জীৱন আৰু জীৱিকাৰ মূল উৎসটিৰ প্ৰতি ভাবুকি নামি অহাত এক প্ৰকাৰ দিক-বিদিক হেৰুৱাইছে এই উদ্যোগটোৰ লগত জড়িত ক্ষুদ্ৰ ব্যৱসায়ীসকল ৷
লগতে পঢ়ক: কাণত ধৰি পুনৰ অসমলৈ নহাৰ পণ কিয় ল’লে এজন ট্ৰাক চালকে ?
