অভয়াপুৰী, 18 নৱেম্বৰ: দেওবাৰে নিশা বঙাইগাঁও জিলাৰ অভয়াপুৰীত সংঘটিত হয় এক চাঞ্চল্যকৰ হত্যা কাণ্ডৰ ঘটনা । অচিনাক্ত দুৰ্বৃত্তই হত্যা কৰে এজন সক্ৰিয় বিজেপি কৰ্মীক । বিজেপি কৰ্মীগৰাকীৰ নাম কানাইলাল সৰকাৰ । নিশা অভয়াপুৰী-হাজো সংযোগী ৰাজ্যিক ঘাইপথৰ ধৰ্মপুৰৰ এখন দলঙৰ তলত লোকজনক হত্যা কৰি পেলাই থৈ যায় দুৰ্বৃত্তই । মৃতদেহৰ কেবাঠাইতো আঘাতৰ চিন স্পষ্ট হৈ থকাৰ পাৰ চোকা অস্ত্ৰৰে আঘাত কৰি হত্যা কৰাৰ সন্দেহ কৰিছে স্থানীয় ব্যক্তিয়ে ।
অভয়াপুৰীত ব্যৱসায় কৰা সৰকাৰে নিশা লেংটিছিঙাৰ নিজ গৃহলৈ গৈ থকা অৱস্থাত সংঘটিত হয় হত্যাকাণ্ডটো । নিশালৈ কানাইলাল সৰকাৰে নিজ ঘৰলৈ উভটি নহাত পৰিয়ালৰ লোকে সন্ধান আৰম্ভ কৰে আৰু অভয়াপুৰী ধৰ্মপুৰৰ দলঙৰ কাষত চাইকেল খন প্ৰত্যক্ষ কৰে । বিচাৰ খোচৰ কৰাত দলঙৰ তলত সৰকাৰ ৰক্তাক্ত অৱস্থাত মৃতদেহ প্ৰত্যক্ষ কৰে । দুৰ্বৃত্তই সৰকাৰৰ ম'বাইল আৰু নগত ধন লৈ যোৱা বুলি সন্দেহ কৰা হৈছে । ঘটনাটোক বঙাইগাঁও জিলা বিজেপিয়ে তীব্ৰ গৰিহণা দিয়াৰ লগতে হত্যাকাৰীক কৰায়ত্ত কৰিবলৈ দাবী জনাইছে ।
