মাণিকপুৰ, 26 মে’ : কৰ’ণা মহামাৰীয়ে আন ক্ষুদ্ৰ ব্যৱসায়ী সকলৰ লগতে দুযোৰ্গ কঢ়িয়াই আনিছে গো-পালক সকলৰ কৰ্ম জীৱনলৈ ৷ বঙাইগাঁও জিলাৰ কোকিলাত নিতৌ প্ৰায় ২৫ৰ পৰা ৩০ হাজাৰ লিটাৰ গাখীৰ উৎপাদন হয় ৷
কিন্তু কৰ’ণাৰ এনে পৰিস্থিতিৰ বাবে দুদিন ধৰি গোপালকে গাখীৰ বিক্ৰী কৰিব নোৱাৰি পেলাই দিবলগীয়া অৱস্থা হৈছে । আমুল কোম্পানীৰ ফ্ৰিজ নষ্ট হোৱাত গাখীৰ নোলোৱাত গোপালৰ মাজত হাহাকাৰৰ সৃষ্টি হৈছে ।
উন্নত জাতৰ গাই গৰু পালন কৰি কোকিলাৰ গো-পালকে লাভৱান হৈছিল যদিও গাখীৰ বিক্ৰী কৰিব নোৱাৰি মূৰে-কপালে হাত দিবলগীয়া হৈছে প্ৰায় ৫ শতাধিক গো-পালকে । আনহাতে, যদি গৰুৰ গাখীৰ খীৰোৱা বন্ধ কৰে তেন্তে গৰুৰ নানা বেমাৰ হোৱাৰ সম্ভাৱনা থকাত গাখীৰ খীৰাই পেলাই দিছে লিটাৰ লিটাৰ গাখীৰ । দুদিনত প্ৰায় ১৩ লক্ষাধিক টকাৰ গাখীৰ পেলাই দিছে গো-পালকে ।
উল্লেখ্য যে, চৰকাৰে গো হত্যা বন্ধ কৰাৰ আইনক গো-পালক সকলে আদৰণি জনাইছে যদিও গৰুৰ খাদ্য আৰু গাখীৰ বিক্ৰীৰ ব্যৱস্থা কৰি দিবলৈ দাবী জনাইছে তেওঁলোকে । গুৱাহাটীত যিসময়ত প্ৰতিলিটাৰ গাখীৰ ৭০-৯০ টকা সেই সময়ত কোকিলাত গাখীৰ পেলাই দিবলগীয়া হোৱা পৰিস্থিতিয়ে চিন্তিত কৰি তুলিছে একাংশ গো-পালকক ।
লগতে পঢ়ক : প্ৰকৃত কৃষকৰ পৰিৱৰ্তে ভুৱা কৃষকৰ হাতলৈ আঁচনিৰ ধন
