নিউজ ডেস্ক, 17 নৱেম্বৰ: দেওবাৰে নিশা ৰাজ্যৰ কেইবাঠাইটো সংঘটিত হ'ল পথ দুৰ্ঘটনা ৷ নগাঁও জিলাৰ কলিয়াবৰৰ বুঢ়াপাহাৰ নেহৰু বস্তিত দেওবাৰে নিশা সংঘটিত হয় ভয়াৱহ পথ দুৰ্ঘটনা ৷ ৩৭ নং ৰাষ্ট্ৰীয় পথত ৰৈ থকা ট্ৰাকত খুন্দা মাৰি গুৰুত্বৰভাৱে আঘাতপ্ৰাপ্ত হল জখলাবন্ধাৰ পৰা কুঠৰী অভিমুখী এখন টাটা মেজিকৰ দুই আৰোহী ৷ ঘটনা অনুসৰি এ. এচ. ০২ চি. চি. ০৪৫০ নম্বৰৰ টাটা মেজিকখনে ৩৭ নং ৰাষ্ট্ৰীয় পথৰ দাঁতিত বিকল হৈ ৰৈ থকা এ. এচ. ০১ ই. চি. ২১৬০ নম্বৰৰ ট্ৰাকখনত পিচফালৰ পৰা খুন্দা মৰাৰ ফলত এই দুৰ্ঘটনাটো সংঘটিত হয় ।আঘাতপ্ৰাপ্ত দুই যুৱক বিক্ৰম ৰংহাং, ধৰম সিং টিচ'ক আৰক্ষীয়ে উন্নত চিকিৎসাৰ বাবে তেজপুৰলৈ প্ৰেৰণ কৰিছে ৷ ইফালে, বঙাইগাঁও জিলাৰ অভয়াপুৰীতো সংঘটিত হল শোকাৱহ পথ দুৰ্ঘটনা ৷ খগৰপুৰ দিশৰ পৰা উত্তৰ শালমাৰা অভিমুখে AS 19M 5450 নম্বৰৰ বাইকেৰে আহি থকা অৱস্থাত নিয়ন্ত্ৰণ হেৰুৱাই বাগৰি পৰি প্ৰাণ হেৰুৱালে চিৰাং জিলাৰ কাজলগাঁৱৰ প্ৰশান্ত ব্ৰহ্ম নামৰ এজন লোকে ৷ দুৰ্ঘটনাটোত নিহত ব্ৰহ্মৰ পত্নী শনিবালা ব্ৰহ্মক সংকটজনক অৱস্থাত বঙাইগাঁৱলৈ প্ৰেৰণ কৰে৷
ইফালে, কালিকা লগা দেওবাৰত বিশ্বনাথটো সংঘটিত হ'ল এক ভয়াৱহ পথ দুৰ্ঘটনা ৷ এখন তীব্ৰ বেগী মটৰচাইকেল আৰু স্কৰপিঅ'ৰ মাজত হোৱা মুখা-মুখি সংঘৰ্ষত থিতাতে প্ৰাণ হেৰুৱালে দুই বাইক আৰোহীয়ে ৷ নিহত বাইক আৰোহী দুজন ক্ৰমে উমেশ সিংহ আৰু দিপক মুণ্ডা ৷
