তেজপুৰ দখলৰ বাবে বদ্ধপৰিকৰ পল্লৱলোচন দাস

অসমীয়াৰ আৱেগক প্ৰতিনিধিত্ব কৰিবলৈ তেজপুৰত ভানু কোনোমতেই যোগ্য প্ৰাৰ্থী নহয় : পল্লৱলোচন দাস

নিউজ ডেস্ক, 24 মাৰ্চ : বহুপ্ৰত্যাশিত তেজপুৰ লোকসভা সমষ্টিৰ পৰা বিজেপিৰ হৈ প্ৰতিদ্বন্দিতা আগবঢ়াব পল্লৱলোচন দাসে ৷ তেজপুৰৰ উপায়ুক্ত কাৰ্যালয়ত সোমাবাৰে মনোনয়ন পত্ৰ দাখিল কৰিব বিজেপিৰ প্ৰাৰ্থী পল্লৱলোচন দাসে ৷ মনোনয়ন দাখিলৰ পাচতে সোমবাৰৰ পৰা তেজপুৰত আৰম্ভ হ'ব বিজেপিৰ নিৰ্বাচনী প্ৰচাৰ ৷

দেওবাৰে গুপ্তকাশী বিশ্বনাথ ধামত বাবা বিশ্বনাথৰ আশীৰ্বাদ লৈ বিৰোধীক দমনৰ বাবে আগবাঢ়িছে তেজপুৰৰ বিজেপিৰ সাংসদীয় প্ৰাৰ্থী পল্লৱলোচন দাস ৷ বহিৰাগত প্ৰাৰ্থী এম জি ভি কে ভানুক তেজপুৰৰ হৈ কংগ্ৰেছে নিৰ্বাচনত থিয় কৰোৱাতো দলটোৰ বাবে এক মাৰাত্মক ভুলত পৰিণত হ'ব বুলি প্ৰকাশ কৰে দাসে ৷ তেজপুৰত ভেটি নাইকিয়া হোৱা কংগ্ৰেছে কেৱল প্ৰাৰ্থী বিচাৰি নোপোৱা বাবেই ভানুক টিকট প্ৰদান কৰিবলগীয়া হোৱা বুলিও প্ৰকাশ কৰে বিজেপিৰ প্ৰাৰ্থী গৰাকীয়ে ৷

জনসাধাৰণৰ আৱেগ, অনুভূতিৰ লগত জড়িত হ'ব পৰা প্ৰাৰ্থীহে তেজপুৰবাসীয়ে বিচাৰে বুলি নিজৰ স্থিতি সমষ্টিটোত যথেষ্ট দৃঢ় বুলি সংবাদ মাধ্যমৰ আগত প্ৰকাশ কৰে পল্লৱলোচন দাসে ৷উল্লেখ্য যে, বিজেপিৰ সাংসদীয় প্ৰাৰ্থী হিচাপে টিকট লাভ কৰাৰ পাচত শনিবাৰ নিজ সমষ্টিত উপস্থিত হৈছিল পল্লৱলোচন দাস৷