বৰপেটাৰোড 5 ছেপ্টেম্বৰ : শনিবাৰে বৰপেটাৰোড আৰক্ষীয়ে অভিযান চলায় ব্ৰাউন ছুগাৰ সহ দুজন যুৱকক আটক কৰিবলৈ সক্ষম হয় ৷ আটকাধীন যুৱক দুজনৰ নাম ইমৰান আলী আৰু কমফেদ আলী ৷ যুৱকদ্বয়ে 31 নম্বৰ ৰাষ্ট্ৰীয় ঘাইপথৰ শিমলাগুৰিৰে AS 15 R 3625 নম্বৰৰ এখন পালছাৰ বাইকেৰে ব্ৰাউন ছুগাৰ কঢ়িয়াই লৈ বৰপেটাৰোড অভিমুখে আহি আছিল ৷ এক গোপন সূত্ৰৰ ভিত্তিত বৰপেটাৰোড আৰক্ষীয়ে 31 নম্বৰ ৰাষ্ট্ৰীয় ঘাইপথত অভিযান চলায় যুৱকদ্বয়ৰ পৰা 53 টা ব্ৰাউন ছুগাৰ ভৰ্তি কন্টেনাৰ জব্দ কৰে ৷ ইয়াৰ লগতে দুই যুৱকক আটক কৰি যুৱকদ্বয়ে ব্যৱহাৰ কৰা বাইকখন জব্দ কৰে আৰক্ষীয়ে ৷
আৰক্ষীয়ে জব্দ কৰা ব্ৰাউন ছুগাৰৰ মূল্য প্ৰায় ত্ৰিছ হাজাৰ টকা হ’ব বুলি অনুমান কৰা হৈছে ৷ ব্ৰাউন ছুগাৰ কঢ়িয়াই অনা ইমৰান আলীৰ ঘৰ চিৰাঙৰ বিজনীৰ 1 নম্বৰ কাৱাডিত আৰু কমফেদ আলীৰ ঘৰ বঙাইগাঁৱৰ মানিকপুৰত বুলি জানিব পৰা গৈছে ৷ সম্প্ৰতি যুৱকদ্বয়ক বৰপেটাৰোড আৰক্ষী থানাত জেৰা অব্যাহত ৰাখিছে আৰক্ষীয়ে ৷
লগতে পঢ়ক : গৰু-ম'হৰ চোৰাং সৰবৰাহকাৰীৰ বিৰুদ্ধে সক্ৰিয় ধুবুৰী আৰক্ষী
