বৰপেটা ,১৬ ফেব্ৰুৱাৰী: ৰাজহুৱা শিক্ষানুষ্ঠানত বছৰ বছৰ ধৰি বিনা পাৰিশ্ৰমিকত শিক্ষাদান কৰি অহা শিক্ষকসকলক তদানীন্তন সৰ্বানন্দ সোণোৱাল চৰকাৰৰ অন্তিম সময়ত 'টিউটৰ' হিচাপে নিযুক্তি দিয়া হৈছিল ৷ ২০২১ বৰ্ষৰ ৫ ফেব্ৰুৱাৰীত শিক্ষকসকলৰ পদ মৰ্যাদা লাঘৱ কৰি 'শিক্ষক'ৰ পৰিৱৰ্তে 'টিউটৰ' নামকৰণেৰে প্ৰাদেশিকীকৰণ কৰা হয় । প্ৰায় ১৫-২০ বছৰৰো অধিক কাল ৰাইজে স্থাপন কৰা তথা চৰকাৰৰ অনুমতি আৰু স্বীকৃতিপ্ৰাপ্ত শিক্ষানুষ্ঠানত বিনা পাৰিশ্ৰমিকত কৰ্মৰত হৈ অহা শিক্ষাগুৰুসকলক দৰমহাৰ পৰিৱৰ্তে মাহেকত ১০৮০০ টকা মজুৰি প্ৰদান কৰে । সেয়েহে পেঞ্চন, গ্ৰেচুইটী, পি এফ, জিপিএফ আদি বিভিন্ন সুবিধাৰ পৰা বঞ্চিত এই শিক্ষাগুৰুসকলে বৃহস্পতিবাৰে ৰাজ্যজুৰি প্ৰতিবাদী কাৰ্যসূচী ৰূপায়ন কৰে (Tutors Protest at Barpeta) ৷
এই কাৰ্যসূচীৰ অংশ হিচাপে বৰপেটা জিলা প্ৰাথমিক শিক্ষা বিষয়াৰ কাৰ্যালয়ৰ সন্মুখত শিক্ষাগুৰুসকলে দুঘন্টীয়া অৱস্থান ধৰ্মঘট ৰূপায়ন কৰে (Office of Barpeta District Primary Education Officer) ৷ কাৰ্যসূচীত অংশ গ্ৰহণ কৰি বৰপেটা জিলাৰ প্ৰাদেশিকীকৃত মধ্য ইংৰাজী আৰু নিম্ন প্ৰাথমিক শিক্ষক সন্থাৰ সভাপতি গণেশ চন্দ্ৰ ৰয়ে কয় যে, ২০-২৫ বছৰে বিনাবেতনেৰে শিক্ষাদান কৰি অহা শিক্ষকসকলক নতুন নিযুক্তিৰ ক্ষেত্ৰত প্ৰযোজ্য হোৱা বিভিন্ন অৰ্হতা জাপি দিয়াটো যুক্তিসংগত হ'বই নোৱাৰে (Provincialised Middle English and Lower Primary Teachers Association) ৷
তেওঁ লগতে কয় যে, টিউটৰৰ পৰা শিক্ষক হিচাপে উন্নীত কৰাৰ ক্ষেত্ৰত নতুন আইনক দোহাই দি শিক্ষকসকলক বঞ্চিত কৰি ৰাখি অৱসৰ ল'বলৈ বাধ্য কৰাইছে । ইয়াৰ প্ৰতিৰোধৰ বাবে শিক্ষক-শিক্ষয়িত্ৰী-সকলে আন্দোলনৰ কাৰ্যসূচী লবলৈ বাধ্য হোৱা বুলি তেওঁ উল্লেখ কৰে ৷ এই কাৰ্যসূচীতে অৱসৰ গ্ৰহণ কেইবাগৰাকী শিক্ষকক সম্বৰ্ধনা জনোৱাৰ লগতে মৃত্যু হোৱা টিউটৰৰ পৰিয়ালকো সম্বৰ্ধনা জ্ঞাপন কৰা হয় ৷ এই কাৰ্যসূচীত তিনি শতাধিক শিক্ষক কৰ্মচাৰীয়ে অংশগ্ৰহণ কৰে ৷
ইপিনে, প্ৰতিবাদকাৰী শিক্ষকসকলে কয় যে, যোৱা ২০২১ চনৰ ৫ ফেব্ৰুৱাৰীত সৰুসজাই ষ্টেডিয়ামত তদানীন্তন শিক্ষামন্ত্রী তথা বৰ্তমানৰ মুখ্যমন্ত্ৰী ড৹ হিমন্ত বিশ্ব শৰ্মাই ঘোষণা কৰা অৱসৰৰ সময়ত টিউটৰ হৈও ১০ লাখ টকাৰ গ্ৰেচুইটী পোৱাৰ কথাটোও এক প্ৰহসন স্বৰূপেহে হৈছে । এই ঘোষণাৰ পৰৱৰ্তী সময়ত যোৱা দুবছৰে বহু টিউটৰে অৱসৰ গ্ৰহণ কৰি সুদা হাতে শিক্ষকতা জীৱন সামৰিবলৈ বাধ্য হোৱা বুলি ক্ষোভ প্ৰকাশ কৰে প্ৰতিবাদকাৰী শিক্ষকসকলে । তেওঁলোকে সমাগত অসম বিধাসভাৰ অধিবেশনত ৰাজ্য়ৰ প্ৰাথমিক স্তৰৰ ৯৫০০ গৰাকী টিউটৰৰ প্ৰাদেশিকীকৰণৰ ক্ষেত্ৰত ব্যৱস্থা গ্ৰহণ নকৰিলে পৰৱৰ্তী সময়ত তীব্ৰ আন্দোলনৰ কাৰ্যসূচী ল'বলৈ বাধ্য হ'ব বুলি ৰাজ্য় চৰকাৰক সঁকিয়াই দিয়ে ।
লগতে পঢ়ক:Students protest demanding Concrete bridge: কলগাছিয়াত পকী দলং নিৰ্মাণৰ দাবী কণ কণ ছাত্ৰ-ছাত্ৰীৰ
