বৰপেটা,20 নৱেম্বৰ : ৰাজহ বিতৰণ ব্যৱস্থাত সংঘটিত হোৱা ব্যাপক দুৰ্নীতিৰ বিৰুদ্ধে বুধবাৰে আম আদমী পাৰ্টিয়ে বৰপেটা জিলাৰ গজিয়া-মেধিৰটাৰী গাঁও পঞ্চায়তৰ কাৰ্যালয়ৰ সম্মুখত তিনিঘন্টীয়া অৱস্থান ধৰ্মঘট কাৰ্যসূচী পালন কৰে ৷ দলটোৰ বৰপেটা জিলাৰ সক্ৰিয় নেতা ফাৰুক খান আৰু জিলা সমন্বয়ক বাশান মল্লিকৰ উদ্যোগত এই অৱস্থান ধৰ্মঘটত প্ৰায় শতাধিক পুৰুষ-মহিলাই অংশগ্ৰহণ কৰে ৷
প্ৰতিবাদকাৰী সকলে সমগ্ৰ অসমৰ লগতে বৰপেটা জিলা খাদ্য আৰু অসামৰিক যোগান বিভাগত ব্যাপক দুৰ্নীতি হোৱা বুলি জানিবলৈ দিয়ে ৷ মৃত্যু হোৱা বহু কেইজন হিতাধিকাৰীৰ নামত ৰেচন উলিয়াই আত্মসাৎ কৰাৰো অভিযোগ উত্থাপন কৰে প্ৰতিবাদকাৰীসকলে ৷ এইবোৰ ভুৱা হিতাধিকাৰীৰ নাম কৰ্তন কৰি ৰেচন কাৰ্ডৰ পৰা বঞ্চিত লোকক প্ৰদান কৰিবলৈ আহ্বান জনাই প্ৰতিবাদকাৰীসকলে। সমান্তৰালকৈ বানপানীত বিধ্বস্ত হোৱা বাট-পথসমূহো শীঘ্ৰেই মেৰামতি কৰিবলৈ দাবী জনায়।
প্ৰতিটো ৰাজহুৱা বিতৰণ ব্যৱস্থাৰ দুৰ্নীতি বন্ধ কৰক,দৰিদ্ৰ পৰিয়ালৰ লোকে ৰেচন কাৰ্ড পোৱা নাই কিয়,ইয়াৰ জবাব দিয়ক,প্ৰতিটো পৰিয়ালক ৰেচন কাৰ্ড দিয়াৰ ব্যৱস্থা কৰক, ৰাজহুৱা বিতৰণ ব্যৱস্থাত কমিছনৰাজ বন্ধ কৰক,আদি শ্ল'গানেৰে পৰিৱেশ উত্তাল কৰি তোলে প্ৰতিবাদকাৰী সকলে। দাবীসমূহ মানি ল'বৰ বাবে ধৰ্মঘটকাৰী সকলে আম আদমী পাৰ্টিৰ বৰপেটা জিলা সমন্বয়ক বাশান মল্লিকৰ স্বাক্ষৰিত এক স্মাৰক পত্ৰ বৰপেটা উপায়ুক্তলৈ প্ৰেৰণ কৰে।
আৰু পঢ়ক : সদনত নুমলীগড় শোধনাগাৰৰ প্ৰসংগ : ব্যক্তিগতকৰণ সমৰ্থন নকৰে দিলীপ শইকীয়াই
