বৰপেটা ৯ নৱেম্বৰঃ ছাত্ৰ ফেডাৰেচন ইণ্ডিয়া চমুকৈ (এছ এফ আই)ৰ বৰপেটা জিলা কমিটীৰ উদ্যোগত বৰপেৰোডৰ শিমলাগুৰিত ৩১ নম্বৰ ৰাষ্ট্ৰীয় ঘাইপথ অৱৰোধ কৰি এক উত্তাল প্ৰতিবাদ সাব্যস্ত কৰে ৷ বিদ্যালয়ত খালী হৈ থকা শিক্ষক পদ পূৰণ কৰা আৰু মধ্যাহ্ন ভোজন আঁচনি ব্যক্তিগতকৰণ বন্ধ কৰা আদিকে ধৰি বিভিন্ন দাবীত প্ৰতিবাদ সাব্যস্ত কৰে প্ৰতিবাদকাৰীসকলে ।
ছাত্ৰ ফেডাৰেচন ইণ্ডিয়া চমুকৈ এছ এফ আইয়ে উচ্চতৰ মাধ্যমিক বিদ্যালয়ত খালী হৈ থকা শিক্ষক পদ পূৰণ কৰা, ব্যক্তিগত খণ্ডৰ বিদ্যালয়ত দুখীয়া ছাত্ৰ-ছাত্ৰীৰ বাবে ২৫ শতাংশ আসন সংৰক্ষণ কৰা, কোচ-ৰাজবংশী সহ অন্যান্য পাঁচ জনগোষ্ঠীক জনজাতিকৰণ কৰা আৰু মধ্যাহ্ন ভোজন আঁচনি ব্যক্তিগতকৰণ কৰা আদিকে ধৰি বিভিন্ন দাবীৰ সমৰ্থনত এই আন্দোলনৰ কাৰ্যসূচী ৰূপায়াণ কৰে ৷ প্ৰতিবাদকাৰী সকলে চৰকাৰৰ বিৰুদ্ধে বিভিন্ন শ্লোগান দি পৰিৱেশ উত্তাল কৰে । প্ৰতিবাদস্থলীত প্ৰায় দুই শতাধিক ছাত্ৰ-ছাত্ৰীয়ে সংগঠনটোৰ সৈতে অংশগ্ৰহণ কৰে । প্ৰতিবাদৰ সময়ত ৰাষ্ট্ৰীয় ঘাইপথৰ সকলো ধৰনৰ যানবাহনৰ চলাচল সম্পূৰ্ণৰূপে বন্ধ হৈ পৰে ৷ প্ৰতিবাদস্থলীত আৰক্ষী আৰু চিআৰপিএফৰ জোৱান উপস্থিত হৈ ৰাষ্ট্ৰীয় ঘাইপথ মুকলি কৰি দিবলৈ ছাত্ৰ সংগঠনটোক আহ্বান জনায় ৷ ইয়াৰ পাছতেই প্ৰতিবাদস্থলীত বৰনগৰ ৰাজহ চক্ৰৰ চক্ৰ বিষয়া মানস শইকীয়াই উপস্থিত হৈ এছ এফ আইৰ ছয়দফীয়া দাবী সম্বলিত এখন স্মাৰক পত্ৰ গ্ৰহণ কৰে । আৰু উক্ত দাবী সমূহ পূৰণৰ বাবে উৰ্ধতন কৰ্তৃপক্ষলৈ প্ৰেৰণ কৰাৰ আশ্বাস দিয়াত ৰাষ্ট্ৰীয় ঘাইপথ মুকলি কৰি দিয়ে প্ৰতিবাদকাৰীসকলে ৷
