সৰুপথাৰত ছাত্ৰী নিৰুদ্দেশঃ অপহৰণ কাণ্ডত লিপ্ত থকাৰ সন্দেহত আটক চাৰি যুৱক

সৰুপথাৰৰ নাওজানত এগৰাকী দশম শ্ৰেণীৰ ছাত্ৰী নিৰুদ্দেশ হোৱা ঘটনাক কেন্দ্ৰ কৰি সৃষ্টি হৈছে তীব্ৰ চাঞ্চল্য ৷ ঘটনাৰ লগত জড়িত থকাৰ সন্দেহত আৰক্ষীয়ে আটক কৰিছে চাৰি যুৱকক ৷

গোলাঘাট, 11 অক্টোবৰঃ সৰুপথাৰৰ নাওজানৰ এটা দৰিদ্ৰ পৰিয়ালৰ এগৰাকী দশম শ্ৰেণীৰ ছাত্ৰী বুধবাৰৰ পৰা সন্ধানহীন হৈ থকা ঘটনাক কেন্দ্ৰ কৰি সমগ্ৰ অঞ্চলজুৰি ব্যাপক চাঞ্চল্যৰ সৃষ্টি হৈছে ৷ ছাত্ৰী গৰাকীক অপহৰণ কৰাৰ সন্দেহত সৰুপথাৰ আৰক্ষীয়ে আটক কৰিছে নাওজান কৈৰিগাৱৰ হানিফ ইছলাম, জাহিৰুল আলি, চৈফুদ্দিন ইছলাম আৰু নগাওঁৰ আলিমুদ্দিন নামৰ ৪ জনকৈ যুৱকক ৷ ঘটনা অনুসৰি যুৱককেইজনে যোৱা মংগলবাৰে পুৱা নাওজান গাঁৱৰ ছাত্ৰীগৰাকীক পিতৃক ফোনযোগে ছাত্ৰীগৰাকীক অপহৰণ কৰাৰ ভাবুকি দিয়াৰ লগতে বিভিন্ন অশ্লীল গালি-গালাজও কৰিছিল ৷ উক্ত ঘটনাৰ পিচত বুধবাৰে নাওজান বজাৰলৈ কাপোৰ চিলোৱাৰ উদ্দেশ্যৰে ভায়েকৰ লগত ওলাই গৈছিল যুৱতীগৰাকী ৷ কিন্তু আধা বাটতে যুৱকেইজনে ভীতি-প্ৰদৰ্শন তথা হত্যাৰ ভাবুকি দি ভায়েকক খেদি পঠাই আৰু তাৰ পিছৰে পৰা সন্ধানহীন হৈ আছে যুৱতী গৰাকী ৷

ইপিনে আৰক্ষীয়ে চাৰি যুৱকক আটক কৰিছে যদিও সন্ধান ওলিয়াব পৰা নাই যুৱতীগৰাকীৰ ৷ কিন্তু আটকাধীন যুৱক কেইজনৰ পৰস্পৰ বিৰোধী ভাষ্যৰ পৰা তেওঁলোকেই যুৱতীগৰাকীক অপহৰণ কৰি লুকুৱাই ৰখা বুলি সন্দেহ কৰিছে আৰক্ষীয়ে ৷

অৱশ্যে আটকাধীন যুৱককেইজনে ফোনৰ যোগেদি ভাবুকি প্ৰদান কৰা কথাটো স্বীকাৰ কৰিছে যদিও ছাত্ৰীগৰাকী নিৰুদ্দেশ হোৱাৰ আঁৰত সিহঁতৰ কোনো হাত নাই বুলি দাবী কৰিছে ৷ আনহাতে ছাত্ৰীগৰাকীৰ পৰিয়াল তথা স্থানীয় সচেতন ৰাইজে ছাত্ৰীগৰাকীক অতি শীঘ্ৰে উদ্ধাৰ কৰি পৰিয়ালক গতাই দিয়াৰ বাবে আৰক্ষী প্ৰশাসনক দাবী জনাইছে ৷

আৰু পঢ়ক