জনিয়া,3 জানুৱাৰীঃ কেন্দ্ৰীয় তথা ৰাজ্য চৰকাৰে নাগৰিকত্ব সংশোধনী আইন প্ৰণয়ন কৰি হিন্দু বিদেশীক নাগৰিকত্ব প্ৰদানৰ যো-জা আৰম্ভ কৰিছে ৷ কিন্তু ইয়াৰ বিপৰীতে ৰাজ্যৰ কেইবাঠাইতো ‘ডি ভোটাৰ’ হিচাপে চিনাক্ত হোৱা বহু লোকে উদঙাই দিছে শাসক দলৰ আন এক ছবি ৷ ৰাজ্যৰ ধৰ্মীয় সংখ্যালঘু লোকসকলক উপযুক্ত নথি-পত্ৰ থকাৰ পিছতো বিজেপি চৰকাৰে পৰিকল্পিত ভাৱে ‘ডি’ ভোটাৰ সজাই নিঃশেষ কৰাৰ ষড়যন্ত্ৰত লিপ্ত হোৱা বুলি এক অভিযোগ উত্থাপিত হৈছে ৷
উল্লেখ্য যে, যোৱা মঙলবাৰে বৰপেটা জিলাৰ কলগাছিয়াৰ স্বাহিদুল ইছলাম নামৰ এজন লোকক বিদেশী সজাই গোৱালপাৰাৰ ডিটেনশ্বন কেম্পলৈ প্ৰেৰণ কৰা হয় ৷ ‘ডি’ ভোটাৰ সজোৱা স্বাহিদুলৰ ককাকৰ 1966 চনৰ ভোটাৰ তালিকাৰ লগতে তেখেতৰ পিতৃয়ে ভোটাধিকাৰ সাব্যস্ত কৰা দিনৰ পৰা বৰ্তমানলৈ সকলো নথি-পত্ৰ আৰু মাটিৰ দলিল মজুত আছে ৷ আটকাধীন স্বাহিদুলৰ ইছলামৰ 2018 চনৰ ভোটাৰ তালিকাতো নাম আছে ৷ এনে ক্ষেত্ৰত তেখেতক বিদেশী সজাই বন্দী কৰি ৰখাৰ কাৰণটো তেঁও ধৰ্মীয় সংখ্যালঘু হোৱাৰ বাবেই নেকি বুলি সচেতন মহলত প্ৰশ্নৰ সৃষ্টি হৈছে ৷ আনহাতে, বিদেশী ন্যায়াধিকৰণত স্বাহিদুলে নিজক ভাৰতীয় বুলি প্ৰামণ কৰিবলৈ যিসমূহ কাগজ পত্ৰ জমা কৰিছিল সেই কাগজসমূহৰ প্ৰকৃত কপিসমূহত বিদেশী ন্যায়াধিকৰণৰ সদস্যই ৰঙা চিয়াঁহীৰে ভোটাৰ পৰিচয় পত্ৰ, পান কাৰ্ড, 1966 চনৰ লিগেচি ডাটা গোচৰ নং তাৰিখ আদি লিখি স্বাক্ষৰ কৰিছে ৷ যাৰ ফলত সেই নথি-পত্ৰসমূহ তেখেতে অন্য কামত ব্যৱহাৰ কৰিব নোৱাৰিব বুলিও সন্দেহ প্ৰাকাশ কৰিছে ৰাইজে ৷
