পাঠশালা, ৫ ছেপ্তেম্বৰ : বিটিচি অঞ্চলৰ অবড়োসকলৰ সুৰক্ষা প্ৰদানৰ লগতে বড়ো আৰু অবড়োসকলৰ মাজৰ সংঘাত দূৰ কৰাৰ উদ্দেশ্যে গঠন হৈছিল অবড়ো সুৰক্ষা সমিতি । বিগত বিধানসভা নিৰ্বাচনত অবড়ো সুৰক্ষা সমিতিয়ে জন্ম দিছিল গণ সুৰক্ষা পাৰ্টি (Gana Suraksha party) নামেৰে ৰাজনৈতিক দল । কোকৰাঝাৰ লোকসভা সমষ্টিৰ সাংসদ নৱ কুমাৰ শৰণীয়াৰ সভাপতিত্বত গঠন হৈছিল গণ সুৰক্ষা পাৰ্টিৰ ।
কিন্তু নিৰ্বাচনত দলটোৰ শোচনীয় পৰাজয়ৰ পাছতে অবড়ো সুৰক্ষা সমিতিৰ (Non Bodo Suraksha Samiti) কেন্দ্ৰীয় সমিতিৰ সভাপতি, সম্পাদক আদিয়ে পৰাজয়ৰ নৈতিক দায়িত্ব স্বীকাৰ কৰি পদত্যাগ পত্ৰ দাখিল কৰিছিল । অৱশ্যে কেন্দ্ৰীয় সমিতিয়ে এই পদত্যাগ পত্ৰ গ্ৰহণ কৰা নাছিল । যাৰ বাবে পৰৱৰ্তী সময়ত পুনৰ সভা অনুষ্ঠিত কৰি কেন্দ্ৰীয় সমিতিয়ে আগৰ কমিটিখনৰ সভাপতি ললিত হেমলম আৰু সম্পাদক মাধৱ ৰাজবংশীকে ৰাখি কমিটিখন গঠন কৰে ।
কিন্তু লক্ষণীয়ভাৱে ইয়াৰ পাছতে শেহতীয়াকৈ সভা অনুষ্ঠিত কৰি এই কমিটি ভংগ কৰি দিয়ে সাংসদ তথা গণ সুৰক্ষা পাৰ্টিৰ সভাপতি নৱ কুমাৰ শৰণীয়াই । সাংসদ গৰাকীৰ এই পদক্ষেপক বেআইনী আখ্যা দিছে অবড়ো সুৰক্ষা সমিতিৰ বিষয়ববীয়াসকলে । নৱ কুমাৰ শৰণীয়াই সভাপতি আৰু সম্পাদকৰ পদত্যাগ পত্ৰৰ অপব্যৱহাৰ কৰাৰ অভিযোগ তুলিছে সমিতিৰ বিষয়ববীয়াই । অবড়ো সকলৰ সমস্যাসমূহ সমাধান নকৰি নিজৰ স্বাৰ্থ লাভৰ বাবে নৱ শৰণীয়াই নিকৃষ্ট ৰাজনীতি কৰা বুলি সভাপতি গৰাকীয়ে সংবাদ মাধ্যমৰ আগত অৱগত কৰে ।
পাঠশালাত এখন সংবাদমেল সম্বোধন কৰি সংগঠনটোৰ নেতাসকলে তীব্ৰ সমালোচনা কৰে সাংসদ নৱ কুমাৰ শৰণীয়াক । নৱ কুমাৰ শৰণীয়াই অবড়োসকলৰ সমস্যা সমাধান হোৱাটো নিবিচাৰে বুলি অভিযোগ কৰিছে নেতাসকলে । অবড়ো সুৰক্ষা সমিতিয়ে শেহতীয়াকৈ ৰাজ্য চৰকাৰ তথা কেন্দ্ৰীয় চৰকাৰৰ সৈতে যোগাযোগ স্থাপন কৰি তেওঁলোকৰ সমস্যা সমাধানৰ চেষ্টা কৰিছে । কিন্তু তেনে হোৱাটো নৱ শৰণীয়াই নিবিচাৰে বুলি অভিযোগ কৰিছে অবড়ো সুৰক্ষা সমিতিৰ নেতাসকলে ।
লগতে পঢ়ক :আলফা স্বাধীনৰ সভাপতিৰ দায়িত্বত পৰেশ অসম
