বৰপেটাৰোড, 29 এপ্ৰিল: শনিবাৰে বৰপেটাৰ সৰভোগত অনুষ্ঠিত হোৱা ভাৰতীয় জনতা পাৰ্টী বৰপেটা জিলাৰ যুৱ মৰ্চাৰ কাৰ্যনিৰ্বাহক সভাত অংশ লয় ৰাজ্যসভাৰ সাংসদ তথা মুখ্যমন্ত্ৰীৰ ৰাজনৈতিক সচিব পৱিত্ৰ মাৰ্ঘেৰিটাই ৷ তেওঁ কয় যে, দেশৰ সকলো জনতাই জানে কেন্দ্ৰত নৰেন্দ্ৰ মোডীইয়ে দশককাল জুৰি প্ৰধানমন্ত্ৰী হৈ থাকিব ৷ ঠিক তেনেদৰে ড৹ হিমন্ত বিশ্ব শৰ্মাইয়ো এক দুই দশক ধৰি অসমৰ মুখ্যমন্ত্ৰী হৈ থাকিব ৷ অসমৰ ৰাইজেও বাৰম্বাৰ আশীৰ্বাদ দি নিজৰ সদিচ্ছা প্ৰকাশ কৰি আহিছে ড৹ হিমন্ত বিশ্ব শৰ্মা নেতৃত্বাধীন চৰকাৰখনৰ প্ৰতি ৷
পৌৰসভা নিৰ্বাচন, পঞ্চায়ত নিৰ্বাচন, জনগোষ্ঠীয় পাৰিষদীয় নিৰ্বাচন আৰু বিধানসভা লোকসভাৰ উপ নিৰ্বাচন সমূহতো ৰাইজে ড৹ হিমন্ত বিশ্ব শৰ্মাৰ নেতৃত্বত ভাৰতীয় জনতা পাৰ্টীৰ চৰকাৰখনৰ প্ৰতি সমৰ্থন আগবঢ়াই আহিছে ৷ আগন্তুক দিনতো অসমৰ প্ৰতিটো নিৰ্বাচনতেই বিজেপিৰ প্ৰাৰ্থীয়েই জয়ী হ’ব বুলি সাংসদ পৱিত্ৰ মাৰ্ঘেৰিটাই উল্লেখ কৰে ৷
মুখ্যমন্ত্ৰী আৰু প্ৰধানমন্ত্ৰীৰ প্ৰশংসাত পঞ্চমুখ সাংসদ গৰাকীয়ে কিন্তু কালিৰে পৰা চলি থকা ৰংঘৰ বিতৰ্ক সন্দৰ্ভত বিশেষ একো মন্তব্য আগনবঢ়হালে ৷ কেন্দ্ৰীয় চৰকাৰৰ পুৰাতত্ব বিভাগে দেশৰ কিছু পৰ্যটনস্থলী পোহৰেৰে আলোকিত কৰাৰ পদক্ষেপ হাতত লৈছে বুলি কৈ তাৰেই অংশ স্বৰূপে হয়তো শিৱসাগৰৰ ৰংঘৰটোও ৰঙীণ আলোকসজ্জাৰে সজাই তোলা হৈছিল বুলিহে কয় সাসংদ গৰাকীয়ে ৷ এতিয়ালৈকে এই আলোকসজ্জাৰে সজ্জিত ৰংঘৰৰ ভিডিঅ’ তেওঁৰ চকুত পৰা নাই বুলিও জানিবলৈ দিয়ে পৱিত্ৰ মাৰ্ঘেৰিটাই (Pabitra Margherita on Rang Ghar controversy) ৷
