বৰপেটা, ১৯ আগষ্ট : দুজনা গুৰুৰ পদৰেণুৰে ৰঞ্জিত সত্ৰনগৰী বৰপেটাৰ পবিত্ৰ ভূমিত অসামাজিক কাৰ্যকলাপ ৷ বৃদ্ধি পাইছে ড্ৰাগছ, মাদক দ্ৰব্যৰ ব্যৱসায় ৷ মুকলিকৈ চলিছে তীৰ, শেষ নম্বৰৰ লটাৰীৰ অবৈধ ব্যৱসায় ৷ চকু মুদা কুলিৰ ভাৱত বৰপেটা আৰক্ষী ৷ নীৰব, নিৰ্বিকাৰ বৰপেটা জিলা প্ৰশাসন ৷ কিদৰে বৰপেটা চহৰৰ মাজমজিয়াত মুকলিকৈ চলি আছে তীৰ, লটাৰীৰ ব্যৱসায় ৷
খোদ আৰক্ষী অধীক্ষকৰ কাৰ্যালয়ৰ সমীপতে অবাধে চলি আছে লটাৰীৰ ৰমৰমীয়া বেহা ৷ বৰপেটা, হাউলী, বৰপেটাৰোডকে ধৰি জিলাখনৰ সৰু বৰ চহৰ সমূহত চলি থকা লটাৰীৰ এই ব্যৱসায় পৰিচালনা কৰে বৰপেটাৰোডৰ আৰু বৰপেটাৰ দুই ব্যৱসায়ীয়ে ৷ আনকি এই দুই নম্বৰী লটাৰীৰ বেহাৰ ওপৰত ৰাজ্যিক বিজেপিৰ সভাপতি ৰণজিৎ কুমাৰ দাসৰো আশীৰ্বাদৰ হাত থকাৰ অভিযোগ ৷ স্বয়ং সৰুক্ষেত্ৰীৰ বিধায়ক জাকিৰ হুছেইন শিকদাৰেই তুলিলে এই ভয়ংকৰ অভিযোগ ৷
সত্ৰনগৰীত চলি থকা লটাৰী, মদ ড্ৰাগছ, ভাঙৰ অবাধ প্ৰচলনক লৈ ক্ষুন্ন বৰপেটা ছাত্ৰ সন্থাই প্ৰশাসনক দাবী তুলিলে কঠোৰভাৱে এই ব্যৱসায় নিয়ন্ত্ৰণ কৰাৰ বাবে ৷ সত্ৰনগৰী বৰপেটাত গঢ়় লৈ উঠা তীৰ, শেষ নম্বৰৰ লটাৰীৰ এই ব্যৱসায় কেতিয়া বন্ধ হ'ব সেইয়া সন্দিবানত ৷
লগতে পঢ়ক : জনীয়াত বিধায়ক শ্বেৰমান আলীৰ প্ৰতিমূৰ্তি দাহ
