জনীয়া, ২৬ জুলাই : ভুটানৰ কুৰিশ্বু নদীবান্ধ প্ৰকল্পৰ পানী এৰি দিয়া হ’ব বুলি বৰপেটা জিলা প্ৰশাসনে ৰাইজক অৱগত কৰাৰ পিছত কলগাছিয়া ৰাজহ চক্ৰৰ অধীনত থকা প্ৰায়বোৰ গাঁৱৰ ৰাইজ এতিয়া আতংকিত হৈ পৰিছে । তেওঁলোকে নিজ ঘৰ এৰি বৰ্তমান ৰাস্তাতে শিবিৰ পাতি আশ্ৰয় ল’ব লগা হৈছে । ২৫ জুলাই সন্ধিয়াৰ পৰা বেঁকী নদীৰ পানীয়ে কালৰূপ ধাৰণ কৰাত জনীয়াৰ খাৰবাল্লী গাঁৱৰ চৰত ঘৰে ঘৰে এবুকু পানী হোৱাত বন্যাৰ্ত সকলে ইতিমধ্যে নিজ গৃহ এৰি খাৰবাল্লী প্ৰাথমিক বিদ্যালয় আৰু কাষৰ ৰাস্তাত শিবিৰ পাতি আশ্ৰয় লৈ আছে । শিবিৰত মানুহ আৰু পশুধনৰ খাদ্য সংকটৰ লগতে বিশুদ্ধ খোৱাপানীৰ অভাৱৰ ফলত এতিয়া দুৰ্ভোগ ভুগিছে বানপীড়িত ৰাইজে । এই পৰ্যন্ত খবৰ ল’বলৈ আহৰি পোৱা নাই জনপ্ৰতিনিধিয়ে ।
নামনিত কুৰিশ্বু আতংক : ৰাজপথত জনতা
