পুত্ৰক অপহৰণ কৰি ৰঙাঘৰত পিতৃ

পুত্ৰক অপহৰণ কৰি ৰঙাঘৰৰ আলহী হ'বলগীয়া হ'ল আমিনুৰ ৰহমান নামৰ এজন পাষাণ পিতৃ ৷ শনিবাৰে দুপৰীয়া পথৰ দাঁতিত খেলি থকা অৱস্থাতে পুত্ৰ ৰিয়াজুলক অপহৰণ কৰি মটৰ চাইকেলত উঠাই লৈ যায় আমিনুৰে ৷ ৰাইজে আমিনুৰক আটক কৰি কলগাছিয়া আৰক্ষীক গতাই দিয়াৰ লগতে ৰিয়াজুলক উদ্ধাৰ কৰে ।

জনীয়া, জুলাই 27 : কলগাছিয়াৰ বেচিমাৰীত সংঘটিত হৈছে এক চাঞ্চল্যকৰ ঘটনা ৷ পুত্ৰক অপহৰণ কৰি ৰঙাঘৰৰ আলহী হ'বলগীয়া হ'ল আমিনুৰ ৰহমান নামৰ এজন পাষাণ পিতৃ ৷ ঘটনাৰ তথ্য অনুসৰি, 7 বছৰ পূৰ্বে বেচিমাৰীৰ আঞ্জুৱাৰা বেগমৰ সৈতে বিবাহ পাশত আৱদ্ধ হৈছিল ঘুগুবাৰীৰ আমিনুৰ ৷ বিবাহৰ চিন স্বৰূপে তেওঁলোকৰ জীৱনলৈ আহে এটি পুত্ৰ সন্তান ৷ কিন্তু বিয়াৰ তিনি বছৰৰ পাচত পত্নী-পুত্ৰক এৰি আন এগৰাকী মহিলাক বিয়া কৰাই আমিনুৰে ৷ পুত্ৰ সহিতে প্ৰথমা পত্নীক ঘৰৰ পৰা খেদি দিয়াত আঞ্জুৱাৰাই আশ্ৰয় গ্ৰহণ কৰে পিতৃ গৃহত ৷ স্বামী আমিনুৰে প্ৰথমা পত্নী আৰু পুত্ৰ কোনো খবৰ নোলোৱাৰ লগতে ভৰণ-পোষণৰ বাবে খা-খৰচ নিদিয়াত আঞ্জুৱাৰা আৰু পৰিয়ালে আমিনুৰৰ বিৰুদ্ধে আদালতত গোচৰ ৰুজু কৰে ৷ কিন্তু শনিবাৰে দুপৰীয়া পথৰ দাঁতিত খেলি থকা অৱস্থাতে পুত্ৰ ৰিয়াজুলক অপহৰণ কৰি মটৰ চাইকেলত উঠাই লৈ যায় আমিনুৰে ৷

এই ঘটনা প্ৰত্যক্ষ কৰি চুবুৰীয়াই ফোনযোগে লাচংগা বজাৰত খবৰ দিয়াত বজাৰত থকা ৰাইজে আমিনুৰক আটক কৰি কলগাছিয়া আৰক্ষীক গতাই দিয়াৰ লগতে ৰিয়াজুলক উদ্ধাৰ কৰে । আনহাতে ৰিয়াজুল নামৰ কণমাণিটোৱে পিতৃক চিনি নাপাই কন্দা-কটা কৰাত শিশুটিক মাৰ-পিটো কৰে পাষাণ পিতৃগৰাকীয়ে ৷ এই ঘটনাই সমগ্ৰ অঞ্চলটোতে সৃষ্টি কৰিছে চাঞ্চল্যৰ ৷