বৰপেটা, ৭ মাৰ্চ: বৰপেটাৰ চাউলখোৱা মহোৎসৱ ৰূপালী জয়ন্তী বৰ্ষ অহা ১৪ মাৰ্চত দিনযোৰা কাৰ্যসূচীৰে পালন কৰা হ'ব ৷ চাউলখোৱা নদীৰ পাৰত অনুষ্ঠিত কৰা হ'ব এই মহোৎসৱ । এই উপলক্ষে চাউলখোৱা মহোৎসৱৰ দেওবাৰে লাইখুঁটা স্থাপন কৰা হয় ৷ বৰপেটাৰ বিধায়ক গুনীন্দ্ৰ নাথ দাসে লাইখুঁটা স্থাপন কৰি এই মহোৎসৱৰ জৰিয়তে বৰপেটাৰ সমাজ সংস্কৃতিৰ প্ৰসাৰৰ লগতে সমন্বয় সাধনত মহোৎসৱখনে বিশেষ উদ্যোগ লোৱা বুলি মন্তব্য কৰে ৷ ইপিনে নিৰ্বাচনৰ বিধি ব্যৱস্থা আৰু কৰ'ণাৰ বাবে এইবেলি এদিনীয়াকৈ অনুস্তুপীয়া কাৰ্যসূচীৰে মহোৎসৱখনি পালন কৰিবলৈ লোৱা বুলি উদ্যোক্তাসকলে জানিবলৈ দিয়ে ৷
উল্লেখ্য যে, শংকৰ-মাধৱ গুৰু দুজনাৰ পদৰেণুৰে ৰঞ্জিত ঐতিহ্যনগৰী বৰপেটাক চুই যোৱা বৰপেটাৰ প্ৰাণ চাউলখোৱা নদীক লক্ষ্য কৰি বৰপেটাত অনুষ্ঠিত হৈ আহিছে চাউলখোৱা মহোৎসৱ ৷ বৰপেটাৰ চাউলখোৱাপৰীয়া সত্ৰীয়া আৰু লোক সংস্কৃতিৰ লগতে বৰপেটাৰ ভাষা, সাহিত্য, সংস্কৃতিৰ বিকাশৰ বাবে অনুষ্ঠিত হৈ অহা চাউলখোৱা মহোৎসৱে এইবেলি ৰূপালী জয়ন্তী বৰ্ষত পদাৰ্পন কৰিছে ৷ বিভিন্ন সাংস্কৃতিক অনুষ্ঠানৰ লগতে শোভাযাত্ৰাও উলিওৱা হ'ব এই মহোৎসৱত ।
লগতে পঢ়ক:আমগুৰিত উন্মোচন অঞ্জন দত্তৰ প্ৰতিমূৰ্তি
