বৰপেটা, 19 এপ্ৰিল: সময়ে সময়ে প্ৰেমৰ বাবেই কোনোবাই জীৱন হেৰুওৱাৰ বহু ঘটনাৰ সাক্ষী হৈ আহিছে আমাৰ সমাজ (murder for love) ৷ মানৱ সমাজক লজ্জিত কৰা এনে ঘটনা সংঘটিত হোৱাৰ পিছত বহু দোষীয়ে শাস্তিও পাইছে ৷ তথাপি, পুনৰাবৃত্তি হৈয়েই আছে এনে ঘটনা ৷ এনে এক খবৰেই আজি আপোনাৰ বাবে লৈ আহিছো ৷
বৰপেটাৰ চতলা গাঁৱৰ ৰুবুল আলীয়ে গুৱাহাটীত বি ফাৰ্ম পঢ়ি আছিল ৷ বৰপেটাৰে বান্দালী গাঁৱৰ এগৰাকী যুৱতীৰ সৈতে প্ৰেমৰ সম্পৰ্ক আছিল ৰুবুলৰ ৷ জানিব পৰা মতে, শেহতীয়াকৈ শনিবাৰে প্ৰেমিকাক এটা ম’বাইল ফোন উপহাৰ দিবলৈ বান্দালী গাঁৱলৈ গৈছিল যুৱকজন ৷ ইয়াৰ পিছত প্ৰেমিকাৰ ঘৰৰ পৰা ব্ৰহ্মপুত্ৰৰ পাৰে পাৰে ফুৰিবলৈ যায় দুয়ো ৷ ইয়াতেই নামে আন্ধাৰ ৷
আন্ধাৰ নমাৰ সুযোগ লৈ সেইসময়তে গাঁওখনৰ কেইজনমান যুৱকে আক্ৰমণ কৰে ৰুবুল আলীক (Attack on boyfriend) ৷ এই আক্ৰমণতে প্ৰাণ হেৰুৱালে ৰুবুলে ৷ ইফালে, এই ঘটনাৰ বিষয়ে অৱগত হোৱা নাছিল ৰুবুলৰ পৰিয়াল ৷ বিগত কেইটামান দিন ধৰি সন্ধানহীন হৈ থকা ৰুবুল আলীৰ মৃতদেহ এতিয়া উদ্ধাৰ হৈছে ব্ৰহ্মপুত্ৰত নদীৰ বহৰি পাৰঘাটত ৷
স্বাভাৱিকতে ৰুবুলৰ মৃত্যুক লৈ এতিয়া শোকৰ ছাঁ পৰিছে সমগ্ৰ অঞ্চলটোত ৷ হত্যাকাৰীৰ কঠোৰ শাস্তিৰ দাবী কৰি উত্থাপন কৰিছে স্থানীয় ৰাইজে ৷ ইপিনে, এই হত্যাকাণ্ডৰ সৈতে জড়িত থকাৰ সন্দেহত দাৰুক আলী, ছাইফুল ইছলাম, ইনজামুল খান , আমিৰুল ইছলাম, বাদশ্বা ফকিৰ, ফৰিদুল ইছলাম, জয়নাল মিঞাকে ধৰি ৭ জনকৈ লোকক আটক কৰিছে আৰক্ষীয়ে ৷
লগতে পঢ়ক : চেহেৰীৰ খাদ্য বনাবলৈ আহি মহিলাই ল’লে চিপজৰী
