ঐক্য আৰু সম্প্ৰীতিৰ নিৰ্দশন দেখুৱাই বৰপেটাত সংখ্যালঘু লোকসকলে উদযাপন কৰিলে বিহু

বিহু অসমীয়া গণ জীৱনৰ সাহ ৷  ৰাজ্যখনৰ থলুৱা জাতি জনগোষ্ঠীৰ দৰেই অসমত বসবাস কৰি অসমী আইকে নিজৰ মাতৃ বুলি আকোৱালি লোৱা পূৰ্ববংগীয় মুলৰ ধৰ্মীয় সংখ্যালঘু সম্প্ৰদায়ৰ মুছলমান লোকসকলেও ৰঙালী বিহু পালন কৰিবলৈ লৈছে ৷

বৰপেটা 3 মেঃ অসমৰ বিভিন্ন জাতি জনগোষ্ঠীৰ মাজত বিহুৱে সদায় সদ্ভাৱ, সম্প্ৰীতি সাধন কৰি আহিছে ৷ বৰপেটা জিলাৰ বহৰিৰ সমীপৰ মুছলমান বসতি গাঁও হৰিপুৰৰত বৃহস্পতিবাৰে উদযাপন কৰা হয় ৰঙালী বিহু ৷ বিশিষ্ট লেখক ইছমাইল হুছেইনে মুকলি বিহুত বিহুনাম গোৱাৰ লগতে গগণা বজাই বিহুৰ উদ্ধোধনী অনুষ্ঠানক এক নতুন ৰূপ দিয়ে ৷ আনহাতে মুছলমান লোকে উদযাপন কৰা বিহু উৎসৱৰ বতৰা লবলৈ মাজুলীৰ পৰা আহি উপস্থিত হ’ল বিহু বিশেষজ্ঞ ৰাজীৱ বৰা ৷ বৰপেটাৰ হৰিপুৰত উদযাপন কৰা ৰঙালী বিহুৰ মুকলি বিহু প্ৰতিযোগিতাখনত ভাগ ললে হৰিপুৰ গাঁৱৰ মুছলমান যুৱক যুৱতী সকলেও ৷ হৰিপুৰৰ বাহাৰুল ইছলামৰ পৃষ্ঠপোষকতা আৰু হৰিপুৰ বিহু উদযাপন সমিতিৰ উদ্যাোগত অনুষ্ঠিত বিহু অনুষ্ঠানত অংশগ্ৰহণ কৰে অঞ্চলটোৰ মুছলমান মহিলা, যুৱতীকে ধৰি সকলো লোকে ৷

কিন্তু এই বিহু উদযাপন কৰিবলৈ গৈ উদযাপন সমিতি মুখামুখী হ'বলগীয়া হৈছে একাংশ ধৰ্মীয় নেতাৰ বিৰোধিতাৰ ৷ উদযাপন সমিতিৰ সভাপতি তথা বয়োজ্যেষ্ঠ নাগৰিক মোতালেপ হুছেইন খানে প্ৰকাশ কৰিলে একাংশৰ প্ৰৱল বিৰোধিতাৰ কথা ৷ আনকি হৰিপুৰৰ মুছলমান যুৱক-যুৱতীসকলে বিহু দল গঠন কৰি বিহুৰ আখৰা চলাই থকাৰ মাজতেই একাংশ যুৱতীক বিহু নাচতো বাধা প্ৰদানৰ ঘটনাও সংঘটিত হ’ল ৷ কিন্তু সকলো বাধা অতিক্ৰম কৰি অসমীয়াত্ব ধাৰণ কৰি এই মুছলমান লোকসকলে হৰিপুৰত দুদিনীয়াকৈ অনুষ্ঠিত কৰিলে ৰঙালী বিহু ৷ লগতে এই বিহুৱে ৰাজ্যৰ সমগ্ৰ মুছলমান সমাজখনলৈ দি গ'ল নতুনৰ আৰম্ভণীৰ এক সুন্দৰ বতৰা ৷