জনীয়া, 4 জুলাই : দুৰ্নীতিমুক্ত অসমৰ কথা কৈ থকা চৰকাৰৰ দিনতেই এতিয়া দুৰ্নীতিৰ বিৰুদ্ধে বিভিন্ন অভিযোগ উত্থাপন হৈছে ৷ এইবাৰ দুৰ্নীতিৰ অভিযোগ উত্থাপন হৈছে কলগাছিয়াত ৷ স্থানীয় ৰাইজে অভিযোগ কৰা অনুসৰি, কলগাছিয়াৰ কাউৰজাহীত ৰিং বান্ধ নিৰ্মাণৰ নামত সংঘটিত হৈছে ব্যাপক অনিয়ম ৷
কলগাছিয়াৰ কাউৰজাহীত ৰিং বান্ধ নিৰ্মাণত বিয়াগোম দুৰ্নীতিৰ আশ্ৰয় লৈছে ৰূপসী উন্নয়ন খণ্ডৰ অন্তৰ্গত 61 নং লাচাংগা গাঁও পঞ্চায়তৰ সভানেত্ৰী ফৰিদা পাৰবীনে ৷ বেকী নদীৰ বান-খহনীয়া প্ৰতিৰোধৰ নামত ধন আত্মসাৎ আৰু আঁচনিৰ যাৱতীয় বাজেট অপচয় কৰিছে পঞ্চায়তৰ সভানেত্ৰীগৰাকীয়ে । পঞ্চায়তৰ সভানেত্ৰী ফৰিদা পাৰবীনেৰ বিৰুদ্ধে গুৰুত্বৰ অভিযোগ উত্থাপন কৰিছে অঞ্চলবাসী ৰাইজে ৷
উল্লেখ্য যে, ৰূপসী উন্নয়ন খণ্ডৰ অন্তৰ্গত 61 নং লাচাংগা গাঁও পঞ্চায়তৰ সভানেত্ৰী ফৰিদা পাৰবীনে স্বামী ৰাছিদুল ইছলাম আৰু প্ৰাক্তন জিলা পৰিষদ সদস্য ৰেহেনা খাতুনৰ সহযোগত চৰকাৰী ধন আত্মসাৎ কৰিছিল ৷ কেৱল ধন আত্মসাৎ কৰাই নহয় নিজৰ খেয়ালখুচি মতে বিভিন্ন আঁচনিৰ ধন আত্মসাৎ কৰি অহাৰ অভিযোগ উত্থাপিত কৰিছে স্থানীয় ৰাইজে । এক প্ৰকাৰে অঞ্চলবাসী ৰাইজ খৰ্গগ্ৰস্ত হৈ পৰিছে ৰূপসী উন্নয়ন খণ্ডৰ অন্তৰ্গত 61 নং লাচাংগা গাঁও পঞ্চায়তৰ সভানেত্ৰী পাৰবীনৰ বিৰুদ্ধে ৷
স্থানীয় ৰাইজে মন্তব্য কৰা অনুসৰি, বাৰিষাৰ প্ৰাকক্ষণত প্ৰতিনিধি গৰাকীয়ে ইছোব বজাৰৰ পৰা হজৰত আলীৰ বাসগৃহলৈ ৰিং বান্ধৰ নামত আঁচনি অনুমোদন লাভ কৰিছিল ৷ কিন্তু ৰিং বান্ধ নিৰ্মাণৰ বিপৰীতে অহা চৰকাৰী ধন আত্মসাৎ কৰাৰহে এক পৰিকল্পনা কৰিছিল ৷ এই গুৰুত্বৰ অভিযোগ উত্থাপন কৰিছে গাঁৱবাসীয়ে ৷
প্ৰায় 18 লাখ 11 হাজাৰ ব্যয় সাপেক্ষে নিৰ্মাণ কৰা ৰিংবান্ধটো নিৰ্মান কাৰ্য সম্পূৰ্ণ নোহোৱাৰ ফলত নদীৰ খহনীয়াত উছন হৈছে নিৰ্মাণৰ কিছু অংশ ৷ যাৰ ফলত অপচয় হৈছে চৰকাৰী আঁচনিটোৰ যাৱতীয় ধন আৰু প্ৰায় পোন্ধৰটা পৰিয়ালৰ ঘৰ-দুৱাৰ জাহ গৈছে বেকী নদীৰ বুকুত । সেয়ে অঞ্চলবাসী ৰাইজে এই কামৰ উচিত তদন্ত কৰিবলৈ দাবী জনাইছে বিভাগীয় কৰ্তৃপক্ষক ৷
লগতে পঢ়ক: উত্তৰাখণ্ডৰ মুখ্যমন্ত্ৰী হিচাপে আজি শপত ল'ব পুস্কৰ সিং ধামিয়ে
