বাক্সা, ৮ অক্টোবৰ : ভাৰতীয় ষ্টেট বেংকৰ অধীনত নিবনুৱা যুৱক-যুৱতীৰ সুবিধাৰ্থে স্থাপন কৰা হৈছে গ্ৰাম্য আত্ম নিয়োজন প্ৰশিক্ষণ কেন্দ্ৰ । এই প্ৰশিক্ষণ কেন্দ্ৰসমূহে স্থানীয় যুৱক-যুৱতীসকলক কাৰিকৰী প্ৰশিক্ষণ দি স্বাৱলম্বী হোৱাত উদগনি যোগাই আহিছে । বাক্সাৰ তামুলপুৰৰ কুমাৰীকাটাতো গ্ৰাম্য আত্ম নিয়োজন প্ৰশিক্ষণ কেন্দ্ৰৰ উদ্যোগতো নিবনুৱা যুৱতী-মহিলাসকলৰ বাবে প্ৰশিক্ষণ দিয়াৰ ব্যৱস্থা কৰা হৈছে ।
বৃহস্পতিবাৰে খাদী গ্ৰাম্যোদ্যোগ বিদ্যালয়ত স্থাপন কৰা গ্ৰাম্য আত্ম নিয়োজন প্ৰশিক্ষণ কেন্দ্ৰৰ উদ্যোগত বিউটি পাৰ্লাৰৰ প্ৰশিক্ষণৰ শুভাৰম্ভণি কৰে কেন্দ্ৰটোৰ এল ডি এম ৰাজ কুমাৰ দাসে । অনুষ্ঠানত উপস্থিত থাকে বাক্সা জিলাৰ গ্ৰাম্য আত্ম নিয়োজন প্ৰশিক্ষণ কেন্দ্ৰৰ সঞ্চালক নকুল চন্দ্ৰ ব্ৰহ্ম, বিউটি পাৰ্লাৰ মেনেজমেণ্ট ট্ৰেইনিঙৰ প্ৰশিক্ষক কবিতা বড়ো, কুমাৰীকাটা খাদী গ্ৰাম্যোদ্যোগ বিদ্যালয়ৰ অধ্যক্ষ দুলাল কুমাৰ চাহা, উপ-অধ্যক্ষ যতীন চৰকাৰৰ লগতে কুমাৰীকাটা RSETIৰ পৰিচালক সুনীল ব্ৰহ্ম ।
৩০ দিনৰ বাবে বিনামূলীয়াকৈ প্ৰশিক্ষণ দিয়া হ'ব মহিলাসকলক। আনহাতে, উক্ত প্ৰশিক্ষণৰ বাবে প্ৰায় ২৫ গৰাকী যুৱতী-মহিলাক নিৰ্বাচিত কৰিছে গ্ৰাম্য আত্ম নিয়োজন প্ৰশিক্ষণ কেন্দ্ৰৰ কৰ্তৃপক্ষই । প্ৰশিক্ষণৰ অন্তত সকলো প্ৰশিক্ষাৰ্থীক প্ৰমাণ পত্ৰ প্ৰদান কৰিব বুলি প্ৰকাশ কৰিছে কুমাৰীকাটা গ্ৰাম্য আত্ম নিয়োজন প্ৰশিক্ষণ কেন্দ্ৰৰ পৰিচালক সুনীল ব্ৰহ্মই ।
লগতে পঢ়ক:বিমানৰ ভিতৰতে দেৱশিশুৰ জন্ম
