বাক্সা,5 জুন: অসামাজিক কাৰ্য-কলাপৰ বিৰুদ্ধে পুনৰ সষ্টম হৈছে তামুলপুৰ আৰক্ষী । সমগ্র ৰাজ্যজুৰি অসম আৰক্ষীয়ে ড্ৰাগছ আৰু অসামাজিক কাৰ্য-কলাপৰ বিৰুদ্ধে অভিযান অব্যাহত ৰখাৰ সমান্তৰালকৈ বাক্সা জিলাৰ তামুলপুৰ আৰক্ষীয়েও ড্ৰাগছ, জুৱা(gambling) আৰু অসামাজিক কাৰ্য-কলাপৰ বিৰুদ্ধে অভিযান তীব্ৰতৰ কৰি তুলিছে ।
শুকুৰবাৰে এক গোপন সূত্ৰৰ পম খেদি তামুলপুৰ আৰক্ষী থানাৰ ভাৰপ্ৰাপ্ত আৰক্ষী বিষয়া দ্বীপেন কলিতা আৰু আৰক্ষী উপ পৰিদৰ্শক নিপন গগৈৰ নেতৃত্বত আৰক্ষীৰ এটা দলে বৰবিলা গাঁৱত অভিযান চলায় । অভিযানকালত আৰক্ষীৰ দলটোৱে ফজিদ আলী(42) নামৰ এজন লোকক আটক কৰে । ফজিদৰ জিম্মাৰ পৰা এখন ডাইচ মেট(dice mate) সহ পাচটা ডাইচ(dice)ৰ গুটি জব্দ কৰাৰ লগতে জুৱা খেলৰ স্থানৰ পৰা দুখন মটৰ চাইকেল জব্দ কৰিবলৈ সক্ষম হয় আৰক্ষীয়ে ।
জানিব পৰা মতে, ফজিদৰ ঘৰ নলবাৰী জিলাৰ ঘগ্ৰাপাৰ থানাৰ অন্তৰ্গত অৰৰা গাঁৱত । ফজিদৰ বিৰুদ্ধে তামুলপুৰ আৰক্ষী থানাত এটি গোচৰ ৰুজু কৰি মুছলপুৰৰ আদালতত হাজিৰ কৰোৱাৰ পাচতে ন্যায়িক জিম্মালৈ প্ৰেৰণ কৰা হয় ।
আনফালে,বিগত ২ জুনৰ সন্ধিয়া তামুলপুৰ মহকুমা সদৰৰ গোৰেশ্বৰ চ’কত এখন জুৱা খেল উৎখাত কৰাৰ লগতে চাৰিগৰাকী জুৱাৰী(gambler)ক আটক কৰে আৰক্ষীয়ে । এই জুৱা খেলৰ পৰা আৰক্ষীয়ে ত্ৰিশ হাজাৰতকৈ অধিক নগদ ধন জব্দ কৰিবলৈ সক্ষম হয় । দৰংগা মেলা আৰক্ষীয়েও ড্ৰাগছ বিৰোধী এক অভিযানত ড্ৰাগছ সৰবৰাহৰ লগত জড়িত থকাৰ অভিযোগত ফাইজল খান(28) নামৰ যুৱকক আটক কৰে ৷ এন কে দৰংগাৰ পৰা আটক কৰি ফাইজল খানক ন্যায়িক জিম্মালৈ প্ৰেৰণ কৰা হৈছে ।
লগতে পঢ়ক: সৰ্থেবাৰীত আটক ড্ৰাগছ মাফিয়া
