বৰমা, ২০ ডিচেম্বৰঃ বাক্সা জিলাৰ ভাৰত ভূটান সীমান্তৰ মধুপুৰ মইনাগুৰী প্ৰাথমিক বিদ্যালয়ত ভাৰতীয় সীমা সুৰক্ষা বাহিনীয়ে এক অভিনৱ পদক্ষেপ গ্ৰহণ কৰে। কণ-কণ ছাত্ৰ-ছাত্ৰীৰ লগতে শতাধিক ৰাইজক বিনামূলীয়া ঔষধ বিতৰণ কৰে ভাৰতীয় সীমা সুৰক্ষা বাহিনীয়ে ।
বাক্সাৰ মধুপুৰত ভাৰতীয় সীমা সুৰক্ষা বাহিনীৰ জোৱান সকলে প্ৰায় ১৫০ খন গাঁৱৰ ৰাইজক স্বাস্থ্য পৰীক্ষা কৰাৰ লগতে বিনামুলীয়াকৈ ঔষধ বিতৰণ কৰে ৷ তাৰোপৰি মধুপুৰ মইনাগুৰী প্ৰাথমিক বিদ্যালয়ত চিএপি ২০১৯-২০ আচনীত ডেক্স বেঞ্চ বিতৰণ কৰে ৷ বিদ্যালয়খনৰ ছাত্ৰ-ছাত্ৰী সকলে যাতে ভালদৰে শিক্ষা গ্ৰহণ কৰিব পাৰে তাৰ ওপৰত নজৰ ৰাখিয়েই বিদ্যালয়খনত ডেক্স-বেঞ্চৰ ব্যৱস্থা কৰি দিছে বুলি জানিবলৈ দিছে হাউলীস্থিত ২৭ বি.এছ.বি.সীমা সুৰক্ষা বাহিনীৰ কাৰ্যবাহী কামাণ্ডেন অচিন্ত মিত্ৰই ৷
তেওঁ লগতে জানিবলৈ দিয়ে যে, ভাৰত চৰকাৰৰ সামাজিক চেতনা অভিযানৰ লগত সংগতি ৰাখি ভাৰত- ভূটান সীমান্তৰ পিছপৰা অঞ্চলৰ পৰা ২৪ জন স্কুলীয়া ছাত্ৰক ভাৰতৰ ৰাজধানী নতুন দিল্লীৰ লগতে পাঁচখন ৰাজ্যত ইতিমধ্যে শিক্ষামুলক ভ্ৰমণৰ বাবে প্ৰেৰণ কৰিছে ৷ এই কাৰ্যসূচীত মধুপুৰ মইনাগুৰী প্ৰাথমিক বিদ্যালয়ৰ প্ৰধান শিক্ষক চণ্ডী প্ৰসাদ দাস, এছ.এছ.বি. মইনাগুৰী কেম্পৰ কাৰ্যবাহী কামাণ্ডেন বিনোদ কুমাৰ দাসৰ লগতে স্থানীয় ৰাইজ উপস্থিত থাকে ৷ সুৰক্ষা বাহিনীৰ এই পদক্ষেপক উপস্থিত ৰাইজে ধন্যবাদ আৰু কৃতজ্ঞতা জ্ঞাপন কৰে ।
