বাক্সা,20 মে’: এফালে ক’ভিড আৰু আনফালে লক ডাউন ৷ বিপাঙত পৰিছে এতিয়া পেটে ভাতে খাই থকা লোকসকল ৷ ক’ভিডৰ ভয়াৱহ বৃদ্ধিয়ে জনজীৱন বিপদাপন্ন কৰাৰ লগতে দৈনিক মজুৰি কৰা অথবা ই-ৰিক্সা চালকসকলৰ পৰিয়ালৰ দুৰৱস্থাই কুলাই পাচিয়ে নধৰা অৱস্থা হৈছে ৷
বিশেষকৈ ই-ৰিক্সা চালকসকলে পুৱা ঘৰৰ পৰা ওলাই অহাৰ পিছত যাত্ৰীৰ বাবে বোন্দাপৰ দিবলগীয়া হয় ৷ পুৱাৰ ভাগত কিছু যাত্ৰী থাকে যদিও আবেলি সম্পূৰ্ণ লক ডাউন হোৱাৰ ফলত তেওঁলোকে ঘৰলৈ যাবলৈ বাধ্য হয় ৷ যাৰ ফলত এমুঠি অন্নৰ বাবে হাহাকাৰ কৰিবলগা হৈছে ই-ৰিক্সাৰ চালকসকল ৷
যাত্ৰীৰ বাবে পথৰ দাঁতিত বোন্দাপৰ ই-ৰিক্সা চালকৰ
এনেদৰে যদি আৰু এক-দুমাহ চলি থাকে, তেন্তে পৰিয়াল চলোৱাত বহু কষ্ট হ’ব বুলিও মন্তব্য কৰে ই-ৰিক্সা চালকসকলে ৷ কাল কৰ’ণাৰ ফলত হোৱা লক ডাউনত এতিয়া পানীত হাঁহ নচৰা অৱস্থা হৈছে ই-ৰিক্সাৰ চালকসকলৰ পৰিয়ালত ৷
