বাক্সাৰ তামুলপুৰত বিপিএফৰ কৰ্মী সভা

এন ডি এফ বিৰ চুক্তিৰ জৰিয়তে ৯৫ খন নতুন গাঁও অন্তৰ্ভূক্ত হ'ব- হাগ্ৰামা মহিলাৰী ।

তামুলপুৰ, 3 নৱেম্বৰ: বাক্সা জিলাৰ তামুলপুৰ মহকুমাৰ মটঙানদীৰ পাৰত দেওবাৰে দিনৰ ২ বজাত বিপিএফৰ এখন কৰ্মী সভা অনুষ্ঠিত হয় । উক্ত কৰ্মী সভাত মুখ্য অতিথি ৰূপে উপস্থিত থাকে বিটিচি প্ৰধান হাগ্ৰামা মহিলাৰীৰ লগতে স্থানীয় বিধায়ক ইমানুৱেল মুছাহাৰী, বিটিচিৰ কাৰ্যবাহী সদস্য বিজিৎ গৌৰা নাৰ্জাৰী, কাৰ্যবাহী সদস্য মহেশ্বৰ বসুমতাৰী ।

সভাত বিটিচিৰ প্ৰধান হাগ্ৰামা মহিলাৰীয়ে প্ৰথমে ইউ পি পি এল আৰু বিপিএফৰ মিত্ৰতাৰ বাবেই আলোচনাত তিনি মাহ সময় নষ্ট হোৱাৰ কথা সদৰি কৰে । সেই আলোচনাৰ সময়ছোৱাত প্ৰথমটো আলোচনা বহুত সুন্দৰকৈ হোৱা বুলি কয় আৰু ইউ জি ব্ৰহ্মৰ ইউ পি পি এল দলটো বিপিএফৰ লগ হ'লে ৰাজ্য সভাৰ সাংসদ পদ দিয়া হ'ব বুলি কৈছিল যদিও ইউ জি ব্ৰহ্মই ওলোটাকৈ বিপিএফ দল ভাঙি ইউ পি পি এল দল কৰিব বিচাৰিছিল বুলি জনায় মহিলাৰীয়ে । যাৰ বাবে বিভিন্ন কাৰণত বিপিএফ আৰু ইউ পি পি এলৰ সৈতে মিত্ৰতা নহ'ল বুলি উল্লেখ কৰে হাগ্ৰামা মহিলাৰীয়ে ।

আনহাতে মহিলাৰীয়ে জনায় যে অচিৰেই এন ডি এফ বি প্ৰগতিশীল ধীৰেন বড়োৰ গোটৰ সৈতে চুক্তি স্বাক্ষৰ হ'বলৈ গৈ আছে আৰু লগতে ৯৫ খনকৈ নতুন গাঁও বিটিচিত অন্তৰ্ভুক্ত হ'ব । প্ৰসংগ ক্ৰমে মহিলাৰীয়ে পাগলদিয়া নদীৰ ওপৰত দলং আৰু গোৰেশ্বৰত ফ্লাই অভাৰৰ বাবে অনুমোদন দিয়াৰ লগতে তামুলপুৰ এখন নতুন জিলা হ'ব আৰু নাওঁকাটা মহকুমা হ'ব বুলি সভাত উল্লেখ কৰে ।