স্পৰ্টছ ডেস্ক, 8 ছেপ্তেম্বৰ : প্ৰধানমন্ত্ৰী নৰেন্দ্ৰ মোডীয়ে ইছৰো আৰু ক্ৰীড়াবিদ সকলক তুলনা কৰি কয় যে, দেশৰ অন্তৰীক্ষ সংস্থা ইছৰো আৰু এথলীট সকলৰ বাবে ব্যৰ্থতা বুলি কোনো বস্তু নাই ৷ উল্লেখ্য যে, ভাৰতৰ দ্বিতীয় চন্দ্ৰ অভিযান চন্দ্ৰযান-2 ৰ পাছতে ভাৰতীয় ক্ৰীড়া পৰিয়ালে ইছৰোক প্ৰশংসা আগবঢ়াইছিল ৷
ভাৰতৰ টেনিছ তাৰকা মহেশ ভূপতিৰ টুইটক পুনৰ টুইট কৰি মোডীয়ে দেওবাৰে পুৱা উল্লেখ কৰে, "ইছৰো আৰু ক্ৰীড়াবিদৰ দৰে চেম্পিয়ন সকলৰ বাবে ব্যৰ্থতা বুলি কোনো বস্তু নাই ৷ কেৱল জ্ঞান অৰ্জন কৰিবলগাহে আছে ৷"
শনিবাৰে ভূপতিয়ে টুইট কৰিছিল, "ইছৰোলৈ শুভেচ্ছা জ্ঞাপন কৰিলো ৷ ইয়াৰ জৰিয়তে চন্দ্ৰত অৱতৰণ কৰিবলৈ তেওঁলোক আৰু ভোকাতুৰ হৈ পৰিব ৷ সমগ্ৰ দেশ ইছৰোক লৈ গৌৰৱাম্বিত ৷ জয় হিন্দ ৷"
উল্লেখ্য যে, চন্দ্ৰত অৱতৰণৰ কিছু পূৰ্বে বিক্ৰমৰ সৈতে যোগাযোগ বিচ্ছিন্ন হৈ পৰাৰ ফলত এনেদৰে সকলোৱে ইছৰোক শুভেচ্ছা জ্ঞাপন কৰাৰ লগতে তেওঁলোকৰ অধ্যৱসায়ৰ বাবে উৎসাহ প্ৰদান কৰিছিল ৷
