স্প’ৰ্টছ ডেস্ক, 7 অক্টোবৰ: লোকে লোকাৰণ্য নলবাৰী জিলাৰ মুকালমুৱাৰ দেশভক্ত ময়দান । কিয়নো ইয়াতে দেওবাৰে নিশা অনুষ্ঠিত হৈছিল দ্বাদশ চক্ৰধৰ ডেকা সোঁৱৰণী প্ৰাইজমানী ফুটবল প্ৰতিযোগিতাৰ ফাইনেল মেচ ৷ মুকালমুৱা আঞ্চলিক ক্ৰীড়া সন্থাৰ দ্বাৰা পৰিচালিত এই প্ৰতিযোগিতাত চূড়ান্ত বিজয়ীৰ সন্মান অৰ্জন কৰে অইল ইণ্ডিয়া এফ চি দুলীয়াজানে ৷
প্ৰতিযোগিতাখনৰ ফাইনেল মেচখন অনুষ্ঠিত হৈছিল দিল্লী এফ চি আৰু অইল ইণ্ডিয়া এফ চি দুলীয়াজানৰ মাজত ৷ ৰোমাঞ্চকৰ এই ফাইনেল মেচখন নিৰ্ধাৰিত সময়ত গ’ল শূন্যভাৱে সমাপ্ত হয় । অৱশ্যে ট্ৰাইবেকাৰ পদ্ধতিৰে 5-3 গ’লৰ ব্যৱধানত অইল ইণ্ডিয়া এফ চি দুলীয়াজানে জয়লাভ কৰি প্ৰতিযোগিতাৰ চূড়ান্ত খিতাপ অৰ্জন কৰে ।
প্ৰতিযোগিতাখনত প্ৰথম পুৰস্কাৰ হিচাপে অইল ইণ্ডিয়া এফ চি দুলীয়াজানে তিনি লাখ টকা লাভ কৰাৰ বিপৰীতে ৰাণাৰ্চ আপৰ সন্মান অৰ্জন কৰা দিল্লী এফ চি দলে লাভ কৰে আঢ়ৈ লাখ টকা । ফাইনেল মেচখনত উপস্থিত থাকি সাংসদ ফণীভূষণ চৌধুৰীয়ে প্ৰতিযোগিতাখনৰ আয়োজক মুকালমুৱা আঞ্চলিক ক্ৰীড়া সন্থাৰ উচ্চ প্ৰশংসা কৰে । সাংসদগৰাকীৰ লগতে GMDA ৰ অধ্যক্ষ নাৰায়ণ ডেকাকে ধৰি বহুকেইজন বিশিষ্ট লোকে উপভোগ কৰে এই ফাইনেল মেচখন ৷
সাংসদ ফণীভূষণ চৌধুৰীয়ে এই প্ৰতিযোগিতাৰ সন্দৰ্ভত কয়, "মুকালমুৱা চহৰ নহয়, এখন গাওঁহে । গ্ৰামাঞ্চলত ইমান ডাঙৰ খেল অনুষ্ঠিত কৰাটো সহজ নহয় । মুকালমুৱা আঞ্চলিক ক্ৰীড়া সন্থাৰ সহযোগত অনুষ্ঠিত খেলখনে এই গাওঁ অঞ্চলৰ পৰাই আগন্তুক দিনত ভাল ভাল খেলুৱৈ জন্ম দিব বুলি বিশ্বাসী" ।
আনহাতে, GMDA ৰ অধ্য়ক্ষ নাৰায়ণ ডেকায়ো বিগত 20 দিন ধৰি চলি থকা এই প্ৰতিযোগিতাত সহযোগ কৰা মুকালমুৱা আঞ্চলিক ক্ৰীড়া সন্থাৰ পৰা আৰম্ভ কৰি সংবাদ জগতলৈ জড়িত প্ৰতিগৰাকী ব্যক্তিক ধন্যবাদ আৰু কৃতজ্ঞতা জনায় ৷
