মৰাণ, 26 ছেপ্তেম্বৰ: মৰাণৰ ধেমেচীত স্থানীয় নৱজ্যোতি সংঘ নামৰ এটা সংগঠনৰ বেনাৰত এচিয়ান ফুটবল ফেডাৰেচনৰ স্বীকৃতিপ্ৰাপ্ত প্ৰশিক্ষক মিন্টু বৰগোঁহাইৰ নেতৃত্বত মাহজুৰি চলি আছে পোন্ধৰ বছৰৰ অনুৰ্দ্ধৰ ছাত্ৰ-ছাত্ৰীৰ ফুটবল প্ৰশিক্ষণ শিবিৰ ৷ যাক লৈ এতিয়া অঞ্চলটোৰ কণ-কণ ছাত্ৰ ছাত্ৰীৰ বৃদ্ধি পাইছে ফুটবলক লৈ ব্যাপক উৎসাহ ৷ গাত নীলা, ৰঙা, হালধীয়া ভিন্ন ৰঙৰ জাৰ্চী পিন্ধি সাতৰ পৰা বাৰ বছৰীয়া শিশু আৰু কিশোৰ-কিশোৰীসকল এতিয়া ব্যস্ত ব্যাপক অনুশীলনত ৷ চকুত মেছী-নেইমাৰ হোৱাৰ আশালৈ অঞ্চলটোৰ বিভিন্ন শিক্ষানুষ্ঠানৰ প্ৰায় ষাঠিজন ছাত্ৰ-ছাত্ৰীয়ে কঠোৰ অনুশীলন কৰি দুভৰিৰ যাদুৰে মোহিছে সকলোকে ৷
ছাত্ৰ-ছাত্ৰী সকলক নিজৰ প্ৰতিভা বিকাশৰ সুযোগ দিয়া এই শিবিৰত সহযোগ কৰিছে প্ৰাক্তন ফুটবলাৰ মৃদুল সন্দিকৈৰ লগতে শাৰিৰীক প্ৰশিক্ষক তৰুণ গগৈয়ে । ইফালে প্ৰতিভাৱান কিশোৰ-কিশোৰী সকলৰ অনুশীলন বুজ ল'বলৈ অলপতে শিবিৰটোত উপস্থিত হয় মৰাণ সমষ্টিৰ বিধায়ক চক্ৰধৰ গগৈয়ে ৷ বিধায়কটোৱে শিবিৰটো পৰিভ্ৰমণ কৰাৰ লগতে প্ৰশিক্ষাৰ্থীসকলৰ লগত মত-বিনিময় কৰি সংঘৰ পদক্ষেপক আদৰণি জনাই ৷ শিবিৰত অংশগ্ৰহণকাৰী ছাত্ৰ-ছাত্ৰীসকলক লৈ এতিয়া খুবেই আশাবাদী প্ৰশিক্ষক মিন্টু বৰগোঁহাই, তেওঁৰ দৃঢ় বিশ্বাস ভাল ফুটবল খেলিব ছাত্ৰ-ছাত্ৰীসকলে ৷
