স্পৰ্টছ ডেস্ক, ৪ নৱেম্বৰ : এক গুৰুত্বপূৰ্ণ লীগ মেচত চলিত বিশ্বকাপত শনিবাৰে নিউজীলেণ্ডৰ বিৰুদ্ধে অৱতীৰ্ণ হৈছে পাকিস্তান । পাকিস্তানৰ ছেমি ফাইনেলত উপনীত হোৱা আশা সজীৱ ৰখাৰ বাবে এইখন মেচত বিজয় গুৰুত্বপূৰ্ণ । আনহাতে, সুন্দৰ আৰম্ভণি সত্ত্বেও শেহতীয়া তিনিখন মেচত পৰাস্ত হৈ নিউজীলেণ্ডো সমস্যাত পৰিছে । ছেমি ফাইনেলত স্থান নিশ্চিত কৰাৰ বাবে নিউজীলেণ্ডৰ বাবে এইখন মেচত জয়লাভ কৰাটোও গুৰুত্বপূৰ্ণ ।
বেংগালুৰুৰ এম চিন্নাস্বামী ষ্টেডিয়ামত পাকিস্তানৰ অধিনায়ক বাবৰ আজমে টছত জয়ী হৈ নিউজীলেণ্ডক প্ৰথমে বেটিং কৰিবলৈ আমন্ত্ৰণ জনায় । নিউজীলেণ্ডৰ হৈ ডেভন কনৱে আৰু ৰাচিন ৰবীন্দ্ৰই দলক সুন্দৰ আৰম্ভণি প্ৰদান কৰে । অৱশ্যে কনৱে ৩৫ ৰাণ কৰি আউট হয় । ইয়াৰ পিছত আঘাতৰ পৰা মুক্ত হৈ দলক পুনৰ নেতৃত্ব প্ৰদান কৰা নিয়মীয়া অধিনায়ক কেন উইলিয়ামছন আৰু ৰবীন্দ্ৰই দলীয় ৰাণৰ গতি ত্বৰান্বিত কৰে ।
উইলিয়ামছনে মাত্ৰ ৫ ৰাণৰ বাবে শতকৰ পৰা বঞ্চিত হ'লেও ৰাচিত ৰবীন্দ্ৰই সুন্দৰ প্ৰদৰ্শন অব্যাহত ৰাখি চলিত বিশ্বকাপত তৃতীয়টো শতক অৰ্জন কৰে । অৱশ্যে শতকৰ পিছত তেওঁৰ ইনিংছ বেছি দূৰ আগবঢ়াব নোৱাৰিলে । ১০৮ ৰাণ কৰি তেওঁ পেভিলিয়নমুখী হয় । বাতৰি যুগুতোৱাৰ পৰলৈকে কিৱি বাহিনীয়ে ৩৭ অভাৰত তিনি উইকেটৰ বিনিময়ত ২৭১ ৰাণ সংগ্ৰহ কৰিছে । আনহাতে, পাকিস্তানৰ হৈ হাচান আলী, ইফতিখাৰ আহমেদ আৰু মহম্মদ ৱাছিম কনিষ্ঠই এটাকৈ উইকেট লাভ কৰে ।
