নিউজ ডেস্ক, 19 ডিচেম্বৰ: বহু প্ৰত্যাশিত ইণ্ডিয়ান প্ৰিমিয়াৰ লীগ (আই পি এল) ২০২৪ ৰ নিলাম প্ৰক্ৰিয়া অব্যাহত আছে ৷ দহটা দলে এই নিলামত অংশগ্ৰহণ কৰিছে আৰু দলীয় কৰ্তৃপক্ষই নিজ নিজ দলৰ বাবে খেলুৱৈ ক্ৰয়ৰ প্ৰচেষ্টা চলাই গৈছে ৷ দুবাইৰ কোকাকোলা এৰিনাত অনুষ্ঠিত গৈছে এই নিলাম প্ৰক্ৰিয়া ৷
আই পি এলৰ নিলামত অষ্ট্ৰেলিয়াৰ বলাৰ মিচেল ষ্টাৰ্ক বৰ্তমানলৈকে সৰ্বাধিক দামত চুক্তিবদ্ধ হৈছে ৷ কলকাতা নাইট ৰাইডাৰ্ছে 24.75 কোটি টকাত আই পি এলৰ চলিত বৰ্ষৰ বাবে চুক্তিবদ্ধ কৰিছে ষ্টাৰ্কক ৷
অষ্ট্ৰেলিয়াৰ অধিনায়ক পেট কামিন্সে অভিলেখ ৰচি ২০.৫০ কোটি টকাত বিক্ৰী হয় ৷ ছানৰাইজাৰ্ছ হায়দৰাবাদে তেওঁক ক্ৰয় কৰে । কামিন্স এজন সোঁহতীয়া পেচাৰ আৰু তেওঁ ল’ৱাৰ অৰ্ডাৰতো বেটিং কৰিব পাৰে । কামিন্সে অষ্ট্ৰেলিয়াক ষষ্ঠবাৰৰ বাবে আইচিচি এদিনীয়া বিশ্বকাপ খিতাপ উপহাৰ দিয়ে । তেওঁ ২ কোটি টকাৰ ভিত্তি মূল্যৰে নিলামত প্ৰৱেশ কৰিছিল আৰু ছানৰাইজাৰ্ছ হায়দৰাবাদ আৰু ৰয়েল চেলেঞ্জাৰ্ছ বেংগালুৰুৰ মাজত নিবিদা যুদ্ধ হৈছিল ।
২০২৩ চনৰ আই পি এলৰ নিলামত পঞ্জাৱ কিংছে ১৮.৫০ কোটি টকাত ক্ৰয় কৰা ছেম কুৰানক চেৰ পেলাই ইণ্ডিয়ান প্ৰিমিয়াৰ লীগত বিক্ৰী হোৱা বহিঃৰাষ্ট্ৰৰ আটাইতকৈ ব্যয়বহুল খেলুৱৈ হিচাপে পৰিগণিত হয় কামিন্স । অৱশেষত চুক্তিখন দখল কৰে ছানৰাইজাৰ্ছ হায়দৰাবাদে । কামিন্সে ৫০ খন টি-২০ মেচ খেলি ৫৫ টা উইকেট লাভ কৰিছে । দক্ষিণ আফ্ৰিকাৰ বিৰুদ্ধে টি-২০ত অভিষেক ঘটাইছিল কামিন্সে ।
কামিন্সে আই পি এল ২০২৩ৰ পৰা বিৰতি লৈছিল কাৰণ তেওঁ এছেছ আৰু ভাৰতত অনুষ্ঠিত হোৱা আই চি চিৰ এদিনীয়া ক্ৰিকেট বিশ্বকাপ ২০২৩ ত মনোনিৱেশ কৰিব বিচাৰিছিল । সোঁহতীয়া বেটছমেন কামিন্সে কলকাতা নাইট ৰাইডাৰ্ছৰ হৈও খেলিছিল আৰু হায়দৰাবাদৰ বাবে তেওঁ হ’ব এক গুৰুত্বপূৰ্ণ অংগ ।
কামিন্সে প্ৰকৃত গতিৰে বলিং কৰে আৰু মোটেৰাত আয়োজক ভাৰতৰ বিৰুদ্ধে এদিনীয়া বিশ্বকাপ ২০২৩ৰ ফাইনেলত গুৰুত্বপূৰ্ণ ভূমিকা পালন কৰে । মিনি নিলামত এক আচৰিত চুক্তি লাভ কৰাৰ পিছত কামিন্স উল্লাসিত হ’ব ।
ইফালে ভাৰতৰ বিৰুদ্ধে বিশ্বকাপৰ ফাইনেলত এটা আক্ৰমণাত্মক ঈগলৰ দৰে যুঁজ দিয়া অষ্ট্ৰেলিয়াৰ বেটছমেন ট্ৰেভিছ হেড ৬.৮০ কোটি টকাত বিক্ৰী হয় । হেডকো হায়দৰাবাদেই ক্ৰয় কৰিছে ৷ এডিলেইডত জন্মগ্ৰহণ কৰা ২৯ বছৰীয়া অষ্ট্ৰেলিয়ান অ’পেনাৰগৰাকীৰ বাবে ছানৰাইজাৰ্ছ হায়দৰাবাদ আৰু চেন্নাই ছুপাৰ কিংছৰ মাজত নিবিদা যুদ্ধ আছিল, যাৰ ভিত্তি মূল্য আছিল ২ কোটি টকা । ২৩ খন টি-২০ খেলি ৫৫৪ ৰান সংগ্ৰহ কৰা হেডৰ এখন খেলত সৰ্বাধিক ৰাণ হৈছে ৯১ ৷
যোৱা নৱেম্বৰত মোটেৰাত এদিনীয়া বিশ্বকাপৰ ফাইনেলত ভাৰতীয় আক্ৰমণক প্ৰত্যুত্তৰ দিয়া আৰু অষ্ট্ৰেলিয়াক ষষ্ঠ বিশ্বকাপৰ খিতাপ দখল কৰাত গুৰুত্বপূৰ্ণ বৰঙণি যোগাইছিল হেডে । মৃদুভাষী হেডৰ বাবে নিবিদা যুদ্ধ চলি থাকিল আৰু শেষত, ছানৰাইজাৰ্ছ হায়দৰাবাদে তেওঁক নিজৰ পক্ষলৈ আনিলে ।
লগতে পঢ়ক: আই পি এল 2024 ৰ নিলাম : শীৰ্ষ পাঁচগৰাকী ভাৰতীয় খেলুৱৈৰ ওপৰত দৃষ্টি থাকিব
