স্পৰ্টছ ডেস্ক, 20 জানুৱাৰী : দেওবাৰৰ দিনটো ভাৰতীয় ক্ৰীড়াপ্ৰেমীৰ বাবে আছিল এটা আনন্দৰ দিন ৷ দেওবাৰৰ দিনটোতে তিনিটাকৈ বিভিন্ন ক্ৰীড়াত ভাৰতে বৃহৎ সাফল্য অৰ্জন কৰিবলৈ সক্ষম হৈছে ৷
ভাৰতীয় ক্ৰিকেট দলৰ হাতত বিধ্বস্ত অষ্ট্ৰেলিয়া :
ভাৰতীয় দলে দখল কৰিছে অন্য এক আন্তৰাষ্ট্ৰীয় এদিনীয়া শৃংখলা ৷ শক্তিশালী অষ্ট্ৰেলিয়াৰ বিৰুদ্ধে তৃতীয় তথা চূড়ান্ত মেচত 7 উইকেটত জয় সাব্যস্ত কৰে দলটোৱে ৷ মুম্বাইত অনুষ্ঠিত প্ৰথমখন এদিনীয়াত পৰাস্ত হৈ 1-0 ত পিছপৰি থকাৰ পাচতো অন্তিম দুখন মেচত জয়েৰে 2-1 ব্যৱধানত শৃংখলা দখল কৰিবলৈ সক্ষম হয় কোহলী নেতৃত্বাধীন ভাৰতীয় দলে ৷
অষ্ট্ৰেলিয়াই গঢ়া 287 ৰাণৰ লক্ষ্য অনুসৰণ কৰি ভাৰতীয় অ'পেনাৰদ্বয় ৰোহিত শৰ্মা আৰু কে. এল. ৰাহুলে 69 ৰাণৰ পাৰ্টনাৰশ্বিপ গঢ়ে ৷ ৰাহুলে 19 ৰাণ সংগ্ৰহ কৰি আউট হোৱাৰ পাচতে বিৰাট কোহলী 3 সংখ্যক স্থানত বেটিঙৰ বাবে আহে ৷ ভাৰতৰ হৈ ৰোহিত শৰ্মাই 119 ৰাণৰ সুন্দৰ ইনিংছ খেলে ৷ আনহাতে, অধিনায়ক বিৰাট কোহলীয়েও 89 ৰাণ সংগ্ৰহ কৰি জোছ হেজলওদৰ বলত উইকেট হেৰুৱায় ৷ খেলত অন্তিম সময়ত শ্ৰেয়াস আয়াৰে অপৰাজিত 44 ৰাণৰ ইনিংছ উপহাৰ দিয়ে ৷ ইয়াৰ জৰিয়তে 15 টা বল বাকী থকা অৱস্থাতে ভাৰতীয় দলে 7 উইকেটত জয় সাব্যস্ত কৰে ৷
নেদাৰলেণ্ডছক পৰাস্ত ভাৰতীয় হকী দলৰ :
ভাৰতীয় হকী দলে নেদাৰলেণ্ডছৰ বিৰুদ্ধে FIH Pro League ৰ দ্বিতীয়খন মেচত ৰোমাঞ্চকৰ জয় সাব্যস্ত কৰিছে ৷ 3-1 ব্যৱধানত শ্বুটআউটৰ জৰিয়তে ভাৰতীয় দলে জয়ী হয় ৷ দুয়ো দলে 3-3 ত ড্ৰ' খেলাৰ পাচতে মেচখন শ্বুটআউটলৈ যায় ৷ শনিবাৰে অনুষ্ঠিত প্ৰথমখন মেচত 5-2 ব্যৱধানত পৰাস্ত হোৱাৰ পাচত দ্বিতীয় মেচত নেদাৰলেণ্ডছ দলে প্ৰত্যাৱৰ্তন কৰিবলৈ সক্ষম হয় ৷
প্ৰথম কোৱাৰ্টাৰত দুয়ো দলে গ'ল কৰিবলৈ সক্ষম নহয় ৷ 24 মিনিটত মিংক ভান ডাৰ ওৱেৰদনে এটা পেনাল্টী কৰ্নাৰ গ'ললৈ ৰূপান্তৰিত কৰে ৷ ইয়াৰ পাচতে ললিত উপাধ্যায়ৰ জৰিয়তে ভাৰতে সমতা স্থাপন কৰে ৷ নেদাৰলেণ্ডছৰ জেৰোয়েন হাৰ্টছবাৰ্গাৰ আৰু বিজৰ্ন কেলাৰমেনে দুটাকৈ গ'ল কৰি 3-1 ত অগ্ৰগতি লাভ কৰে ৷ ভাৰতৰ হৈ 51 মিনিটত মন্দীপ সিঙে এটা গ'ল কৰাৰ লগতে ৰূপীন্দৰপাল সিঙে এটা গ'ল কৰি 3-3 ত সমতা স্থাপন কৰে ৷ ইয়াৰ পাচতে প্ৰয়োগ কৰা শ্বুটআউটত ভাৰতীয় দলে 3-1 ব্যৱধানত জয়ী হয় ৷
অনুৰ্দ্ধ-19 বিশ্বকাপ অ'পেনাৰত শ্ৰীলংকাক পৰাস্ত ভাৰতৰ :
অধিনায়ক প্ৰিয়ম গাৰ্গ (56), অপেনাৰ যশশ্বী জয়ছৱাল (59) আৰু উইকেট কীপাৰ ধ্ৰুৱ জুৰেলৰ (অপৰাজিত 52) ৰ জৰিয়তে অনুৰ্দ্ধ-19 বিশ্বকাপত শ্ৰীলংকাক 90 ৰাণত পৰাস্ত কৰে অনুৰ্দ্ধ-19 ভাৰতীয় ক্ৰিকেট দলে ৷
প্ৰথমে বেটিং কৰি ভাৰতীয় দলে 4 টা উইকেট হেৰুৱাই 297 ৰাণ সংগ্ৰহ কৰে ৷ ইয়াৰ পৰিৱৰ্তে শ্ৰীলংকা দলে আটাইকেইটা উইকেট হেৰুৱাই 207 ৰাণহে কৰিবলৈ সক্ষম হয় ৷
আৰু পঢ়ক : তৃতীয় এদিনীয়াত শতকঃ আন্তঃৰাষ্ট্ৰীয় ক্ৰিকেটত 9000 ৰান সম্পূৰ্ণ ৰোহিত শৰ্মাৰ
