স্পৰ্টছ ডেস্ক, 8 ফেব্ৰুৱাৰী : শনিবাৰে দ্বিতীয় এদিনীয়াত ভাৰতক 251 ৰাণত অল আউট কৰি এদিনীয়া শৃংখলা 2-0 ব্যৱধানত দখল কৰিলে নিউজিলেণ্ড দলে ৷ তিনিখনীয়া শৃংখলাৰ ইডেন পাৰ্কত অনুষ্ঠিত দ্বিতীয় মেচত ভাৰতক 22 ৰাণত পৰাস্ত কৰে নিউজিলেণ্ডে ৷
274 ৰাণৰ লক্ষ্য অনুসৰণ কৰি ভাৰতে 71 ৰাণতে চাৰিটাকৈ উইকেট হেৰুৱায় ৷ পৃথ্বী শ্ব'(24), মায়ংক আগৰৱাল(3), বিৰাট কোহলী(15) আৰু কে. এ. ৰাহুলে মেচখনত প্ৰভাৱ বিস্তাৰ কৰিবলৈ সক্ষম নহ'ল ৷ ইয়াৰ পাচতে কেদাৰ যাদৱ আৰু শ্ৰেয়াস আয়াৰে বেটিং কৰিবলৈ নামে যদিও 25 ৰাণৰ পাৰ্টনাৰশ্বিপ গঢ়াৰ পাচতে টিম ছাউদিৰ হাতত কেৱল 9 ৰাণ কৰিয়ে যাদৱে উইকেট হেৰুৱায় ৷
ইয়াৰ পাচতে আয়াৰে ৰবীন্দ্ৰ জাদেজাৰ সৈতে বেটিং কৰি অৰ্ধশতক অৰ্জন কৰিবলৈ সক্ষম হয় ৷ 52 ৰাণ সংগ্ৰহ কৰি হামিছ বেনেটৰ হাতত উইকেট হেৰুৱায় আয়াৰে ৷ 9 সংখ্যক স্থানত বেটিং কৰিবলৈ নামি নৱদ্বীপ ছাইনীয়ে জাদেজাৰ সৈতে 76 ৰাণৰ পাৰ্টনাৰশ্বিপ গঢ়ে ৷ জয়ৰ বাবে 45 ৰাণ বাকী থকা অৱস্থাতে ছাইনীয়ে 45 ৰাণ সংগ্ৰহ কৰি কাইলী জেমিয়েছনৰ হাতত উইকেট হেৰুৱায় ৷ ইয়াৰ পাচতে ৰবীন্দ্ৰ জাদেজাই দলৰ দায়িত্ব বহন কৰি 73 বলত 55 ৰাণ সংগ্ৰহ কৰে ৷ কিন্তু তেওঁৰ উইকেটৰ পতন হোৱাৰ পাচতে দলে 251 ৰাণত ইনিংছ সামৰিবলৈ বাধ্য হয় ৷
ইয়াৰ পূৰ্বে ৰ'ছ টেইলৰৰ অপৰাজিত 73 ৰাণৰ জৰিয়তে নিউজিলেণ্ডে 8 টা উইকেট হেৰুৱাই 273 ৰাণ সংগ্ৰহ কৰে ৷ আনহাতে, মাৰ্টিন গুপটিলে 79 আৰু হেনৰী নিকলছে 41 ৰাণৰ ইনিংছ উপহাৰ দিয়ে ৷ ইয়াৰ জৰিয়তে ভাৰতৰ সন্মুখত 274 ৰাণৰ লক্ষ্য বান্ধি দিয়ে নিউজিলেণ্ড দলে ৷ ভাৰতৰ হৈ য়ুজবেন্দ্ৰ চাহালে সৰ্বাধিক 3 টা উইকেট দখল কৰে ৷
আৰু পঢ়ক : স্পট ফিক্সিঙৰ গোচৰত 17 মাহৰ কাৰাদণ্ডৰ নিৰ্দেশ নাছিৰ জামছেদক
