স্পৰ্টছ ডেস্ক, 15 জুনঃ COVID-১৯ ৰ পাচতেই ইংলেণ্ডৰ বিৰুদ্ধে তিনিখন মেচৰ টেষ্ট শৃংখলাৰ বাবে ইতিমধ্যে ইংলেণ্ডত গৈ বাহৰ পাতিছে ৱেষ্ট ইণ্ডিজ ক্ৰিকেট দলটোৱে । অহা 8 জুলাইৰ পৰা মুখামুখি হ'ব দুয়োটা দল । কিন্তু ইয়াৰ পূৰ্বেই খেলুৱৈৰ মাজত আৰম্ভ হৈছে বাক্য়বাণৰ যুঁজ ।
ইংলেণ্ডৰ বেগীবলাৰ জফ্ৰা আৰ্চাৰক ইতিমধ্যে ৱেষ্ট ইণ্ডিজ ক্ৰিকেট দলৰ বেগীবলাৰ কেমাৰ ৰ'চৰ সকীয়নি । বন্ধুত্বৰ কোনো স্থান নাই বুলি উল্লেখ কৰিছে কেৰেবিয়ান খেলুৱৈগৰাকীয়ে । লগতে ৱেষ্ট ইণ্ডিজ দলটোৱে ইংলেণ্ডৰ বিৰুদ্ধে জয় সুনিশ্চত কৰাৰ ওপৰত অধিক মনোনিৱেশ কৰিছে বুলিও কয় ৰ'চে । এক ৱেবচাইটত এই কথা উল্লেখ কৰিছে খেলুৱৈগৰাকীয়ে ।
উল্লেখ্য যে, দৰ্শকবিহীন ভাৱে অনুষ্ঠিত কৰা হ'ব এই টেষ্ট শৃংখলা । কৰ'ণা ভাইৰাছৰ সংক্ৰমণৰ প্ৰতি লক্ষ্য ৰাখিয়ে এই সিদ্ধান্ত গ্ৰহণ কৰা হৈছে ।
মন কৰিবলগীয়া কথা এই যে, এই শৃংখলাত বলাৰে বলত চুইং লাভৰ বাবে থুঁ অথবা চালাইভাৰ ব্যৱহাৰ কৰিব নোৱাৰিব । গতিকে সেই দৃষ্টিকোণেৰেও বহু খেলুৱৈ তথা ক্ৰিকেট অনুৰাগীৰো এই শৃংখলাৰ ওপৰত অধিক দৃষ্টি নিৱদ্ধ হৈ থাকিব ।
এই সন্দৰ্ভত কেমাৰ ৰ'চেও এই প্ৰতিবন্ধকতা বলাৰৰ বাবে কঠিন প্ৰত্যাহ্বান হিচাপে থিয় দিব বুলি স্বীকাৰ কৰে । লগতে বৰ্তমান সময়ত ইংলেণ্ডৰ জলবায়ুও ঘাম নিৰ্গত কৰাৰ ক্ষেত্ৰত বাধাৰ সৃষ্টি কৰিব বুলি উল্লেখ কৰিছে খেলুৱৈগৰাকীয়ে ।
ইংলেণ্ড বনাম ৱেষ্ট ইণ্ডিজ সময়সূচী :
| তাৰিখ | সময় (IST) | টেষ্ট মেচ | স্থান |
| 8-12 জুলাই | দুপৰীয়া 3:30 বজাত | ইংলেণ্ড বনাম ৱেষ্ট ইণ্ডিজ, প্ৰথম টেষ্ট | এজেছ ব'ল |
| 16-20 জুলাই | দুপৰীয়া 3:30 বজাত | ইংলেণ্ড বনাম ৱেষ্ট ইণ্ডিজ, দ্বিতীয় টেষ্ট | অল্ড ট্ৰফফ্ৰৰ্ড |
| 24-28 জুলাই | দুপৰীয়া 3:30 বজাত | ইংলেণ্ড বনাম ৱেষ্ট ইণ্ডিজ, তৃতীয় টেষ্ট | অল্ড ট্ৰফফ্ৰৰ্ড |
