চিটাৰা,৫ফেব্ৰুৱাৰী: বলীউডৰ অভিনেত্ৰী প্ৰিয়ংকা চোপ্ৰাই তেওঁৰ ছবি 'দ্য হোৱাইট টাইগাৰ'ৰ বাবে বিশ্বৰ অন্য়তম শীৰ্ষ বঁটা 'ব্ৰিটিছ একাডেমী অৱ ফিল্ম এণ্ড টেলিভিছন আৰ্টছ' চমুকৈ 'বাফটা'ৰ বাবে মনোনয়ন লাভ কৰিছে । শ্ৰেষ্ঠ সহ অভিনেত্ৰীৰ শাখাত মনোনয়ন লাভ কৰিছে অভিনেত্ৰী তথা ছবি খনৰ সহ প্ৰযোজক প্ৰিয়ংকাই । দীঘলীয়া তালিকাখনত নাম অন্তৰ্ভুক্ত হোৱাৰ পিছতে প্ৰিয়ংকা চোপ্ৰাৰ ভগ্নী পৰিনীতি চোপ্ৰা আনন্দত মতলীয়া হৈছে । পৰিনীতিয়ে সামাজিক মাধ্য়মত 'বাফটা'ৰ সহ অভিনেত্ৰীৰ তালিকাখনৰ এটা স্ক্ৰীণশ্বট শ্বেয়াৰ কৰি নিজৰ আনন্দ প্ৰকাশ কৰা দেখা গ'ল ।
এইবছৰৰ 'বাফটা'ৰ বাবে মনোনয় লাভ কৰা ছবি আৰু বিভিন্ন শিতানৰ এক দীৰ্ঘ তালিকা বৃহস্পতিবাৰে প্ৰকাশ কৰা হৈছিল । য'ত শেহতীয়াকৈ মুক্তি পোৱা 'দ্য হোৱাইট টাইগাৰ' ছবিখনে শ্ৰেষ্ঠ চলচ্চিত্ৰ, শ্ৰেষ্ঠ অভিনেতা আৰু শ্ৰেষ্ঠ পৰিচালককে ধৰি কেইবাটাও শিতানত মনোনয়ন লাভ কৰিছে । ইফালে ৰামিন বাহৰাণীৰ এই ছবিখনত প্ৰিয়ংকা চোপ্ৰাৰ সৈতে বলৰাম হালবাইৰ চৰিত্ৰত অভিনয় কৰা অভিনেতা আদৰ্শ গৌৰৱৰ নাম অন্তৰ্ভূক্ত হৈছে 'বাফটা'ৰ শ্ৰেষ্ঠ অভিনেতাৰ দীঘলীয়া তালিকাত ।
উল্লেখ যে অৰবিন্দ আদিগাৰ 'মেন বুকাৰ পুৰস্কাৰ' লাভ কৰা 'দ্য হোৱাইট টাইগাৰ' গ্ৰন্থখনৰ আধাৰত নিৰ্মাণ কৰা হৈছিল এই ছবিখন । ইতিমধ্য়ে ছবিখন নেটফ্লিক্সত সম্প্ৰচাৰ কৰি থকা হৈছে ।
লগতে পঢ়ক:বায়'পলাৰ চৰিত্ৰত অদা শৰ্মা
