নগাঁও, 13 ডিচেম্বৰ : দেওবাৰে নগাঁও আৰক্ষীৰ তৎপৰতাত জব্দ কৰা হৈছে হাইজেক কৰা এখন মালবাহী ট্ৰাক । নগাঁও জিলাৰ ঠেকেৰাগুড়িৰ পৰা মালবাহী এখন ট্ৰাক হাইজেক হোৱাৰ তথ্য লাভ কৰি নগাঁও আৰক্ষীয়ে অভিযান চলাই ট্ৰাকখন জব্দ কৰাৰ লগতে ঘটনাৰ সৈতে জড়িত থকাৰ অভিযোগত চাৰিজনকৈ লোকক আটক কৰে ।
নগাঁও আৰক্ষীৰ অতিৰিক্ত আৰক্ষী অধীক্ষক মোহন লাল মিনাৰ নেতৃত্বত শুকুৰবাৰে নিশা আৰক্ষীৰ এটা দলে হাইজেক হোৱা ট্ৰাকখন বিচাৰি নগাঁও চহৰৰ বিভিন্ন স্থানত অভিযান আৰম্ভ কৰে । এক গোপন সূত্ৰৰ ভিত্তিত আৰক্ষীয়ে চলোৱা অভিযানত নগাঁও জিলাৰ ৰাঙলুৰ পৰা চাৰিজন লোকক আটক কৰিবলৈ সক্ষম হয় । লগতে, আৰক্ষীয়ে উদ্ধাৰ কৰিবলৈ সক্ষম হয় হাইজেক হোৱা ট্ৰাকখনো ।
লগতে পঢ়ক : BTR আৰু TAC নিৰ্বাচন শাসকীয় দল বিজেপিৰ বাবে টেষ্ট পৰীক্ষাহে: ৰণজিত কুমাৰ দাস
তদুপৰি, আৰক্ষীয়ে ডকাইতি কাণ্ডত ব্যৱহাৰ হোৱা এখন চাৰিচকীয়া বাহনৰ লগতে এখন তৰোৱালো জব্দ কৰে । ধৃত লোক কেইজন হ'ল ৰাঙলুৰ গোলাম মহম্মদ, ইমৰাণ হুছেইন, মইনুল হক আৰু নগাঁও চহৰৰ বেঙেনাআতিৰ ছাইফুল ইছলাম ।
ইতিমধ্যে, আৰক্ষীয়ে লোক কেইজনৰ বিৰুদ্ধে ভাৰতীয় দণ্ডবিধি আইনৰ 306/2020, 120(B)/346/366/397 ধাৰাৰ অধীনত গোচৰ পঞ্জীয়ন কৰি তদন্ত আৰম্ভ কৰিছে ৷ উল্লেখযোগ্য যে, হাইজেক হোৱা ট্ৰাকখনৰ চালক আৰু হেণ্ডিমেনক হাত ভৰি বান্ধি থোৱা অৱস্থাত আৰক্ষীয়ে নিশা ডবকাৰ পৰা উদ্ধাৰ কৰে ।
লগতে পঢ়ক : ইনষ্টাগ্ৰামত পুত্ৰৰ সৈতে ছবি শ্বেয়াৰ হাৰ্দিক পাণ্ডিয়াৰ
