ইন্টাৰনেশ্যনেল ডেস্ক, 29 অক্টোবৰ : ৰাষ্ট্ৰসংঘৰ পেলেষ্টাইনী শৰণাৰ্থী সংস্থাই জনোৱা মতে, হাজাৰ হাজাৰ লোকে তেওঁলোকৰ গাজাৰ সাহাৰ্য গুদাম ভাঙি খাদ্য আৰু অন্যান্য জীয়াই থকাৰ মৌলিক সামগ্ৰী লৈ যায় ৷ গাজাত সংস্থাটোৰ সঞ্চালক থমাছ হোৱাইটে দেওবাৰে কয় যে ইজৰাইল আৰু গাজাৰ হামাছৰ মাজত তিনি সপ্তাহ ধৰি চলি থকা যুদ্ধৰ অন্তত নাগৰিক শৃংখলা ভাঙিবলৈ আৰম্ভ কৰাৰ এক চিন্তনীয় লক্ষণ ৷
ইউএনআৰডব্লিউএ নামেৰে পৰিচিত এই সংস্থাটোৱে গাজাৰ লাখ লাখ লোকক মৌলিক সেৱা আগবঢ়ায় ৷ সমগ্ৰ ভূখণ্ডৰ বিদ্যালয়সমূহ আশ্ৰয় শিবিৰলৈ ৰূপান্তৰিত কৰা হৈছে য’ত সংঘাতৰ ফলত স্থানচ্যুত হোৱা পেলেষ্টাইনীসকলক আশ্ৰয় দিয়া হৈছে ৷
ইজৰাইলে সৃষ্টি কৰা যোগাযোগৰ ব্লেকআউট অব্যাহত থকাৰ সময়তে শনিবাৰে গাজা ষ্ট্ৰিপত কোনো আন্তঃৰাষ্ট্ৰীয় সাহাৰ্য প্ৰৱেশ কৰা নাছিল ৷ পেলেষ্টাইনী ৰেড ক্ৰীচেণ্টৰ মুখপাত্ৰ নেবাল ফাৰছাখে দ্য এছ’চিয়েটেড প্ৰেছক জনোৱা মতে, শনিবাৰে কোনো সাহাৰ্য ট্ৰাক গাজাত প্ৰৱেশ কৰা নাছিল ৷ কাৰণ যোগাযোগ অসম্ভৱ আৰু গাজাৰ ভিতৰৰ দলসমূহে ইজিপ্তৰ ৰেড ক্ৰীচেণ্ট বা ৰাষ্ট্ৰসংঘৰ কৰ্মীৰ সৈতে সংযোগ স্থাপন কৰিব নোৱাৰে ৷
শনিবাৰৰ পূৰ্বে মুঠ 84 খন সাহাৰ্য ট্ৰাক গাজাত প্ৰৱেশ কৰিছিল, যিটো বিদ্যুৎ, খাদ্য, চিকিৎসা সামগ্ৰী আৰু বিশুদ্ধ খোৱাপানীৰ প্ৰয়োজনীয়তা থকা 23 লাখ লোকৰ বাবে এক ক্ষুদ্ৰ পৰিমাণ আছিল ৷
ইফালে পৰিষদৰ আৰব প্ৰতিনিধি সংযুক্ত আৰব আমিৰশ্বাহীৰ অনুৰোধত সোমবাৰে বিয়লি ৰাষ্ট্ৰসংঘৰ নিৰাপত্তা পৰিষদে গাজাত ইজৰাইলৰ স্থল আক্ৰমণৰ সন্দৰ্ভত এখন জৰুৰী বৈঠকৰ দিন ধাৰ্য কৰে ৷
গাজাৰ বহু লোকৰ বাবে ইণ্টাৰনেট আৰু টেলিফোন সংযোগ পুনৰুদ্ধাৰ কৰা হৈছে বুলি টেলিকম কোম্পানী পালটেল, ইণ্টাৰনেট-প্ৰৱেশৰ পোষকতাকাৰী গোট নেটব্লকছ ডট অৰ্গ আৰু স্থলভাগত নিশ্চিত কৰা হৈছে ৷ শুকুৰবাৰে সন্ধিয়াৰ পৰা ঘেৰাও কৰা গাজা ষ্ট্ৰিপত যোগাযোগ বিচ্ছিন্ন হৈ পৰাৰ ফলত ইজৰাইলৰ প্ৰচণ্ড আকাশ আৰু স্থল বোমাবৰ্ষণৰ মাজতে ইয়াৰ 23 লাখ বাসিন্দা বহিঃজগতৰ পৰা বিচ্ছিন্ন হৈ পৰিছিল ৷
ইউ এছ এছ ড্ৱাইট ডি আইছেনহাৱাৰ বিমানবাহী জাহাজ আৰু ইয়াৰ ষ্ট্ৰাইক গ্ৰুপে জিব্ৰাল্টাৰ জলদ্বীপৰ মাজেৰে গতি কৰি দুখন আমেৰিকান বিমানবাহী জাহাজ ভূমধ্য সাগৰত ৰাখিছে, যিটো শেহতীয়া বছৰবোৰত বিৰল দৃশ্য ৷ ইউ এছ এছ গেৰাল্ড আৰ ফৰ্ড কেৰিয়াৰ ষ্ট্ৰাইক গ্ৰুপ ইতিমধ্যে পূব ভূমধ্যসাগৰত আছে, যিয়ে হামাছৰ বিৰুদ্ধে ইজৰাইলক সমৰ্থন জনাইছে ৷
ইৰাণ আৰু ইয়াৰ প্ৰক্সি উগ্ৰপন্থী গোটসমূহক যুদ্ধ ব্যাপক কৰাৰ চেষ্টাত বাধা দিবলৈ আমেৰিকান বাহিনীয়ে মধ্যপ্ৰাচ্যত নিজৰ উপস্থিতি সম্প্ৰসাৰণ কৰাৰ সময়তে শনিবাৰে ভূমধ্যসাগৰলৈ যাত্ৰা কৰে আইছেনহাৱাৰ জাহাজখনে ৷ লগতে ছুৱেজ খালৰ মাজেৰে আমেৰিকাৰ চেণ্ট্ৰেল কমাণ্ড অঞ্চললৈ যোৱাৰ কথা জাহাজখনৰ ৷
