নিউজ ডেস্ক, ১৭ এপ্ৰিলঃ শুকুৰবাৰে COVID-১৯ ত মৃত্য়ু হোৱা লোকৰ নতুন তথ্য দিলে চীনে । মুঠ ৪,৬৩২ গৰাকী লোকৰ মৃত্যু হোৱা বুলি সদৰি কৰিছে চীনে । আনহাতে কৰ'ণা ভাইৰাছ উৎপত্তিস্থল ৱুহানত নতুনকৈ ১২৩০ জন অতিৰিক্ত লোকৰ মৃত্যু হোৱা বুলি উল্লেখ কৰে চীনে । আন্তঃৰাষ্ট্ৰীয় স্তৰত নানান সমালোচনাৰ পাচতেই এই তথ্য দাঙি ধৰিছে চীন চৰকাৰে ।
১৬ এপ্ৰিললৈ ৱুহান চহৰত আক্ৰান্তৰ সংখ্য়া পুনৰ ৩২৫ টা বৃদ্ধি পায় মুঠ ৫০,৩৩৩ টা হোৱাৰ বিপৰীতে ৱুহানত নতুনকৈ মৃত্যু হৈছে ১২৯০ গৰাকী লোক । বৰ্তমান লৈকে চহৰখনত মৃত্যুৰে সংখ্য়া বৃদ্ধি পাই হৈছে ৩৮৬৯ জন । দেশখনত মুঠ আক্ৰান্তৰ সংখ্যা বৃদ্ধি পাই হৈছে ৮২,৬৯২ জন ।
এই সন্দৰ্ভত ৱুহান চহৰৰ নগৰপালিকা মুখ্য কাৰ্যালয়ৰ পৰা এক বিজ্ঞপ্তি প্ৰকাশ কৰি কোৱা হৈছে সংশোধিত আইন আৰু বিধি, জনসাধাৰণ তথা নিহতৰ প্ৰতি দায়বদ্ধতাৰ নীতি অনুসৰিয়ে এই তথ্য প্ৰকাশ কৰা হৈছে ।
