নিউজ ডেস্ক, 28 জুলাইঃ পাকিস্তান প্ৰধানমন্ত্ৰীৰ আমেৰিকা ভ্ৰমণৰ পিচতেই দুয়োখন দেশৰ মাজৰ সামৰিক-সম্পৰ্কই উন্নতি লাভ কৰিছে ৷ শেহতীয়াকৈ হোৱাইট হাউছে ইছলামাবাদলৈ ঘোষণা কৰিছে 125 মিলিয়ন ডলাৰৰ আৰ্থিক সাহাৰ্য প্ৰদানৰ কথা ৷ F16 যুদ্ধবিমানৰ 24x7 নিৰীক্ষণ কৰিবলৈ আমেৰিকাই এইদৰে পাকিস্তানক বৃহৎ পৰিমাণৰ ধন দিবলৈ ৰাজী হৈছে আমেৰিকা যুক্তৰাষ্ট্ৰ ৷
আমেৰিকাৰ প্ৰতিৰক্ষা সুৰক্ষা সংস্থাৰ দ্বাৰা প্ৰকাশিত এক প্ৰেছ বিজ্ঞপ্তিত এই কথা উল্লেখ কৰিছে দেশখনে ৷ বিজ্ঞপ্তিটোত স্পষ্টৰূপে উল্লেখ আছে যে, পাকিস্তানৰ F16 যুদ্ধবিমান শান্তিৰক্ষী আঁচনিৰ বাবে প্ৰযুক্তিগত আৰু সামগ্ৰীগত সাহাৰ্যৰূপে আমেৰিকাই 125 মিলিয়ন ডলাৰ আগবঢ়াব ৷ এইক্ষেত্ৰত আমেৰিকাই দেশখনৰ F16 যুদ্ধবিমানক 24x7 নিৰীক্ষণত ৰাখিব ৷ অৰ্থনৈতিকভাৱে জুৰুলা হৈ পৰা পাকিস্তানৰ আভ্যন্তৰীণ বিষয়ত হস্তক্ষেপ কৰিবলৈ ওলোৱা আমেৰিকাৰ জটিল চুক্তি অনিচ্ছাস্বত্ত্বেও গ্ৰহণ কৰিছে পাকিস্তানে ৷ সন্ত্ৰাসবাদৰ বিৰুদ্ধে ব্যৱহাৰ কৰিবলৈ আমেৰিকাৰ পৰা ক্ৰয় কৰা পাকিস্তানৰ F16 যুদ্ধবিমান চুক্তিক লৈ বিগত বৰ্ষতো বিতৰ্কৰ সৃষ্টি হৈছিল ৷ আমেৰিকাৰ দাবী অনুসৰি পাকিস্তানে সন্ত্ৰাসবাদ প্ৰতিৰোধত ব্যৰ্থ হোৱাৰ বিপৰীতে চুক্তি অৱলম্বন কৰি অন্যান্য আক্ৰমণমূলক কামত F16 যুদ্ধবিমান ব্যৱহাৰ কৰি আহিছে আৰু সেয়া ভাৰতে সংঘটিত কৰা এয়াৰ ষ্ট্ৰাইকৰ সময়টো পৰিলক্ষিত হৈছিল ৷ যাৰ বাবে আমেৰিকাই পাকিস্তানলৈ 1.66 বিলিয়ন অৰ্থনৈতিক সাহাৰ্য্য বাতিল কৰিছিল ৷ বালাকোট এয়াৰ ষ্ট্ৰাইকৰ পিচতে পঞ্চম প্ৰজন্মৰ উন্নত ক্ষমতাসম্পন্ন আমেৰিকান F16 যুদ্ধবিমান ভাৰতৰ প্ৰথম প্ৰজন্মৰ আঁওপুৰণি মিগ 21 বাইছনে ভূপতিত কৰিছিল আৰু তাৰ প্ৰমাণ বিশ্ববাসীৰ আগতো প্ৰদৰ্শন কৰিছিল ভাৰতে ৷
