চিটাৰা ডেস্ক, ১ ছেপ্টেম্বৰ: শেহতীয়াকৈ দক্ষিণৰ অন্যতম জনপ্ৰিয় তথা শীৰ্ষ অভিনেত্ৰী এগৰাকীয়ে ইনষ্টাগ্ৰামত আত্মপ্ৰকাশ কৰিছে । ইনষ্টাগ্ৰামত অহাৰ ৯ ঘণ্টাৰ ভিতৰতে এই অভিনেত্ৰীগৰাকীয়ে ১০ লাখতকৈও অধিক ফ’ল’ৱাৰ লাভ কৰিছে । এইগৰাকী অভিনেত্ৰী আন কোনো নহয়, শ্বাহৰুখ খানৰ ‘জৱান’ৰ মুখ্য অভিনেত্ৰী নয়নতৰা । অভিনেত্ৰীগৰাকীয়ে ৩১ আগষ্টত ইনষ্টাগ্ৰামত আত্মপ্ৰকাশ কৰিছে ।
৩১ আগষ্টত শ্বাহৰুখ খানৰ বন্ধু তথা অভিনেত্ৰী নয়নতৰাই ইনষ্টাগ্ৰামত আত্মপ্ৰকাশ কৰিছিল ৷ ইফালে, এটলীৰ পৰিচালনাত নিৰ্মিত ‘জৱান’ ছবিখনৰ ট্ৰেইলাৰো মুকলি কৰা হৈছে । এই সকলো আলোচনাৰ মাজতে নয়নতৰাই কেইঘণ্টামানৰ ভিতৰতে ১০ লাখৰো অধিক ফ’ল’ৱাৰ লাভ কৰে ইনষ্টাগ্ৰামত ।
ইয়াৰ লগে লগে দ্ৰুতগতিত ফ’ল’ৱাৰ পোৱা অভিনেত্ৰী হৈ পৰিল নয়নতৰা
সংবাদ মাধ্যমৰ খবৰ অনুসৰি নয়নতৰাই অভিলেখ গঢ়িছে ইনষ্টাগ্ৰামত ৷ দ্ৰুতগতিত লাখ লাখ ফ’ল’ৱাৰ লাভ কৰা অভিনেত্ৰী হিচাপে পৰিগণিত হৈছে নয়নতৰা । ইয়াৰ পূৰ্বে কোনো অভিনেত্ৰীৰ ইমান কম সময়ৰ ভিতৰতে ইমান ফ’ল’ৱাৰ হোৱা নাছিল ।
আনকি কেটৰিনা কাইফেও ২৪ ঘন্টা অপেক্ষা কৰিবলগীয়া হৈছিল
বলীউডৰ সুন্দৰী কেটৰিনা কাইফে ইনষ্টাগ্ৰামত আত্মপ্ৰকাশ কৰিছিল তেতিয়া তেওঁ ১০ লাখ ফ’ল’ৱাৰ পাবলৈ ২৪ ঘণ্টা অপেক্ষা কৰিবলগীয়া হৈছিল । আনহাতে নয়নতৰাৰ ২৪ ঘণ্টাৰ সম্পূৰ্ণ হোৱাৰ পূৰ্বেই ১৪ লাখ হৈছেগৈ ফ’ল’ৱাৰ । অভিনেত্ৰীগৰাকীয়ে তেওঁৰ ছবি জৱানৰ সৈতে জড়িত প্ৰথমটো পোষ্ট শ্বেয়াৰ কৰিছিল । প্ৰথমে শ্বেয়াৰ কৰিছিল জৱানৰ ট্ৰেইলাৰ । ইয়াৰ পিচত তেওঁ নিজৰ যমজ সন্তানৰ সৈতে এটি চুটি ভিডিঅ’ শ্বেয়াৰ কৰিছিল ৷
‘জৱান’ৰ অভিনেত্ৰী নয়নতৰাই তামিল আৰু তেলেগু উদ্যোগটোত নিজৰ এক সুকীয়া পৰিচয় গঢ়ি তুলিছে ৷ লেডী ছুপাৰষ্টাৰৰ মৰ্যাদাও লাভ কৰা এনে এগৰাকী অভিনেত্ৰী হৈছে নয়নতৰা । বৰ্তমান জৱানৰ জৰিয়তে শ্বাহৰুখ খানৰ বিপৰীতে হিন্দী ছবিত আত্মপ্ৰকাশ কৰিছে অভিনেত্ৰীগৰাকীয়ে ৷ এই ছবিখন পৰিচালনা কৰিছে এটলীয়ে । ২০২৩ চনৰ ৭ ছেপ্টেম্বৰত ছবিগৃহত মুক্তি পাব এই ছবিখন । য’ত বিজয় সেতুপথিয়ে খলনায়কৰ চৰিত্ৰত অভিনয় কৰিছে ।
